స్వదేశీ పరిజ్ఞానంతో తయారు చేసిన పృథ్వీ-2 అణ్వస్త్ర క్షిపణిని రాత్రి పూట పరీక్షించింది భారత సైన్యం. డీఆర్డీఓ పర్యవేక్షణలో ఒడిశాలోని బాలాసోర్ నుంచి ఈ పరీక్షలను విజయవంతంగా నిర్వహించింది.
చాందీపుర్ సమీపంలో ఉన్న ఇంటిగ్రేటెడ్ టెస్ట్ రేంజీ నుంచి ఈ ప్రయోగం చేపట్టినట్లు డీఆర్డీఓ అధికారులు తెలిపారు. లాంచ్ కాంప్లెక్స్-3 నుంచి ఓ మొబైల్ లాంచర్ ద్వారా క్షిపణిని పరీక్షించినట్లు వెల్లడించారు. చివరిసారిగా 2019 నవంబర్ 20న పృథ్వీ క్షిపణిని చీకటిలో పరీక్షించినట్లు చెప్పారు.
ఇది సాధారణంగా జరిగే ప్రక్రియ అని.. క్షిపణి వెళ్లే మార్గాన్ని రాడార్లు, ఎలెక్ట్రో ట్రాకింగ్ సిస్టమ్ల ద్వారా పరిశీలించామని డీఆర్డీఓ అధికారులు తెలిపారు.
లిక్విడ్ ప్రొపల్షన్ ఇంధనంతో రెండు ఇంజిన్లు కలిగిన పృథ్వీ-2 క్షిపణి 500-1000 కిలోల వార్హెడ్లను మోసుకెళ్లగలదు. లక్ష్యాలను చేధించడానికి అధునాతన ట్రాజెక్టరీ వ్యవస్థ ఉంటుంది. ఇంటిగ్రేటెడ్ గైడెడ్ మిస్సైల్ డెవలప్మెంట్ ప్రోగ్రామ్ ద్వారా పృథ్వీ క్షిపణిని 2003లో సైన్యానికి అందించింది డీఆర్డీఓ.
