తూర్పు లద్దాక్ గాల్వన్ లోయ ప్రాంతంలో నెలకొన్న ఉద్రిక్త పరిస్థితులను చల్లబరిచేందుకు భారత్-చైనాలు వరుసగా మూడో రోజు మేజర్ జనరల్స్ స్థాయిలో చర్చలు జరిపాయి. వాస్తవాధీన రేఖ వెంబడి ఇరుదేశాలు తమ సైనిక బలగాలను వెనక్కి తీసుకోవడం సహా.. సరిహద్దుల్లో శాంతియుత వాతావరణాన్ని పునరుద్ధరించడమే లక్ష్యంగా ఇరుదేశాల ఉన్నతాధికారులు సమావేశమయ్యారు.
గాల్వన్ లోయ వద్ద చెలరేగిన ఉద్రిక్తతలను చల్లబరిచేందుకు మంగళవారం, బుధవారం జరిపిన చర్చల్లో సానుకూల ఫలితాలు కనిపించలేదు. ఈ నేపథ్యంలో ఇవాళ మరో దఫా చర్చలు నిర్వహించారు.
ఘర్షణ
తూర్పు లద్దాక్లో నెలకొన్న ప్రతిష్టంభనకు ముగింపు పలుకుతూ.. ఈ నెల ప్రారంభంలోనే భారత్ చైనా మధ్య ఓ ఒప్పందం కుదిరింది. ఈ ఒప్పందం మేరకు సైనిక బలగాలు సరిహద్దుల నుంచి వెనక్కి మళ్లాలి. అయితే ఈ ప్రక్రియ జరుగుతుండగా.. ఇరుదేశాల సైనికుల మధ్య ఘర్షణ జరిగింది.
ఈ ఘర్షణలో 20 మంది భారత సైనికులు వీరమరణం పొందగా.. 18 మంది తీవ్రంగా గాయపడ్డారు. మరోవైపు 43 మంది చైనా సైనికులు కూడా మరణించినట్లు తెలుస్తోంది. ఈ నేపథ్యంలో సరిహద్దు ఉద్రిక్తతలకు ముగింపు పలికేందుకు ఇరుదేశాల సైన్యాలు మరోమారు సమావేశమయ్యాయి.
దీటుగా బదులిస్తాం..
చైనా బరితెగింపుపై భారత ప్రధాని నరేంద్ర మోదీ తీవ్రంగా స్పందించారు. సరిహద్దుల్లో శాంతి స్థాపనకే భారత్ కట్టుబడి ఉందన్న ఆయన.. దేశ సార్వభౌమత్వ పరిరక్షణలో రాజీ పడేది లేదని స్పష్టం చేశారు. శ్రుతి మించితే దీటైన సమాధానం ఇచ్చే సత్తా భారత్కు ఉందని హెచ్చరించారు.
ఇదీ చూడండి: 'రథయాత్రకు అనుమతిస్తే జగన్నాథుడు క్షమించడు'
