పాక్​ సైనిక పోస్టులను ధ్వంసం చేసిన భారత్​

పాక్​​ బలగాలు ప్రతిరోజూ కాల్పుల విరమణ ఒప్పందాన్ని ఉల్లంఘిస్తూనే ఉన్నాయి. భారత సైనికులు, సరిహద్దు గ్రామాల ప్రజలే లక్ష్యంగా కాల్పులకు తెగబడుతున్నాయి. పాక్​కు ​బుద్ధి చెప్పేందుకు సైనిక పోస్టులను ధ్వంసం చేసింది భారత్​.

పదేపదే కాల్పుల విరమణ ఒప్పందాన్ని ఉల్లంఘిస్తూ దాడులకు తెగబడుతున్న పాకిస్థాన్​ సైన్యానికి గట్టి బదులిచ్చింది భారత సైన్యం. వాస్తవాధీన రేఖను అనుకొని ఉన్న ఏడు పాక్​ సైనిక పోస్టులను ధ్వంసం చేసింది. ఈ దాడిలో పలుపురు పాక్​ సైనికులు మృతి చెంది ఉండొచ్చని భారత అధికారులు తెలిపారు.

పాక్​ ఆక్రమిత కశ్మీర్​లోని రాక్​చక్రీ, రావల్​కోట్​ ప్రాంతాల్లోని పాక్​ సైన్యం పోస్టులను ధ్వంసం చేసింది భారత సైన్యం.

బుద్ధి చెప్పేందుకే...

పాకిస్థాన్​ గత రెండు రోజుల్లోనే అనేకసార్లు కాల్పుల విరమణ ఒప్పందాన్ని ఉల్లంఘించింది. పూంచ్ జిల్లాలోని నియంత్రణ రేఖ వెంబడి పాకిస్థాన్​ దళాలు సోమవారం కాల్పులకు తెగబడ్డాయి. ఈ కాల్పుల్లో ఓ బీఎస్ఎఫ్ ఇన్‌స్పెక్టర్, స్థానిక బాలిక ప్రాణాలు కోల్పోయారు. 24 మందికిపైగా గాయపడ్డారు. మంగళవారం కూడా భారత సైనికులు, సరిహద్దు గ్రామాల ప్రజలే లక్ష్యంగా కాల్పులు జరిపాయి పాక్​ బలగాలు. ఈ కాల్పుల్లో ఇద్దరు పౌరులు గాయపడ్డారు.

ఈ దాడులకు గట్టి సమాధానమిచ్చేందుకే పాక్​ పోస్టులను భారత సైన్యం ధ్వంసం చేసింది. ఈ ఘటనలో తమ సైనికులు ముగ్గురు చనిపోయారని పాకిస్థాన్​ అధికారులు వెల్లడించారు.

పాఠశాలలకు సెలవు

పోస్టులను ధ్వంసం చేసినందుకు గాను పాక్ సైన్యం ప్రతీకార చర్యలకు దిగే అవకాశం ఉందనే అంచనాతో భారత్ అప్రమత్తమైంది. ముందు జాగ్రత్తగా పూంచ్, రాజౌరీ సెక్టార్లలో సరిహద్దు వెంబడి ఉన్న పాఠశాలలకు సెలవులు ప్రకటించారు అధికారులు.