తూర్పు లద్ధాఖ్లో చైనా సరిహద్దుల వద్ద దూకుడుగానే ఉండాలని భారత సైన్యం నిర్ణయించింది. సరిహద్దుల వద్ద చైనా ప్రభుత్వం బలగాలను మోహరిస్తున్న నేపథ్యంలో సైన్యం తీసుకున్న ఈ నిర్ణయం ప్రాధాన్యం సంతరించుకుంది.
దిల్లీలో 3 రోజుల పాటు జరిగిన ఆర్మీ కమాండర్ల సమావేశం శుక్రవారం ముగిసింది. ఈ భేటీలో ప్రస్తుత ఉద్రిక్త పరిస్థితులతో పాటు పలు సున్నిత అంశాలపై చర్చ జరిగినట్లు సమాచారం. సమావేశం అనంతరం సైన్యం ఓ సంక్షిప్త ప్రకటన విడుదల చేసినా, అందులో ఏ అంశాలపై చర్చ జరిగిందీ వెల్లడించలేదు.
ఆ ప్రాంతాల్లో దూకుడుగానే..
విశ్వసనీయ వర్గాల సమాచారం ప్రకారం తూర్పు లద్ధాఖ్తో పాటు, జమ్ము కశ్మీర్లోని తాజా పరిస్థితులపై విస్తృతంగా చర్చలు జరిగినట్లు తెలిసింది. సరిహద్దులోని పాంగాంగ్ సో సరస్సు, గాల్వన్ లోయ, డెమ్చోక్, దౌలత్ బేగ్ ఓల్డీ వద్ద దూకుడుగానే ఉండాలని నిర్ణయించినట్లు సమాచారం.
చైనా ఒత్తిళ్లకు ఎట్టి పరిస్థితుల్లోనూ లొంగకూడదని నిర్ణయం తీసుకున్నట్లు తెలుస్తోంది. వాస్తవాధీన రేఖ వెంబడి మునుపటి పరిస్థితి కొనసాగేలా చూడాలని నిర్ణయించింది.
