భారత్, అమెరికా మూడో దఫా 2+2 చర్చలు దిల్లీలో అక్టోబర్ 27న జరగనున్నట్లు విదేశాంగా శాఖ (ఎంఈఏ) తెలిపింది. రక్షణ, భద్రత, అంతర్జాతీయ వ్యూహాత్మక సంబంధాలను మరింత బలోపేతం చేసే మార్గాలపై ఈ సదస్సులో చర్చించే అవకాశం ఉంది.
చర్చల్లో పాల్గొనడానికి అమెరికా విదేశాంగ మంత్రి మైక్ పాంపియో, రక్షణ మంత్రి మార్క్ ఎస్పర్.. అక్టోబర్ 26న భారత్కు రానున్నట్లు ఎంఈఏ తెలిపింది. భారత ప్రతినిధి బృందానికి రక్షణ మంత్రి రాజ్‌నాథ్ సింగ్, విదేశాంగ మంత్రి జైశంకర్ నాయకత్వం వహిస్తారని వెల్లడించింది.
నిఘా, సైనిక రంగాల్లో..
ఈ సదస్సులో నిఘా, సైనిక వ్యవస్థల్లో పరస్పర సహకారాన్ని విస్తరణకు మార్గం సుగమం చేయనున్నట్లు సంబంధిత వర్గాలు తెలిపాయి. దీర్ఘకాలంగా పెండింగ్లో ఉన్న బేసిక్ ఎక్స్చేంజి అండ్ కోఆపరేషన్ అగ్రిమెంట్ (బీఈసీఏ)ను ఖరారు చేసే అవకాశం ఉంది. బీఈసీఏ ద్వారా ఇరు దేశాల మధ్య అత్యంత అధునాతన సైనిక సాంకేతికత, రవాణా, భౌగోళిక మ్యాపుల మార్పిడి సాధ్యమవుతుంది.
చైనా దూకుడుపై..
తూర్పు లద్దాఖ్లో ఉద్రిక్తతలతోపాటు ఇండో-పసిఫిక్ ప్రాంతంలో చైనా దూకుడు పెంచిన నేపథ్యంలో ఈ ఉన్నతస్థాయి చర్చలకు ప్రాధాన్యం సంతరించుకుంది. ఈ రెండు అంశాలపై భేటీలో చర్చకు వచ్చే అవకాశం ఉన్నట్లు తెలుస్తోంది. ఇప్పటికే లద్దాఖ్లో చైనా వైఖరిని అమెరికా తీవ్రంగా ఖండిస్తోంది.
విస్తృత చర్చలు...
భారత్తో చర్చలకోసం ఎదురుచూస్తున్నట్లు పాంపియో వెల్లడించారు. ఈ చర్చల్లో ద్వైపాక్షిక అంశాలపై విస్తృతంగా చర్చిస్తామని స్పష్టం చేశారు. ఇండో పసిఫిక్ ప్రాంతంలో స్వేచ్ఛా వాణిజ్యానికి తీసుకోవాల్సిన చర్యలపై మాట్లాడుతామని తెలిపారు. చైనా కమ్యూనిస్ట్ పార్టీకి వ్యతిరేకంగా దేశాలన్ని కలిసి పనిచేయాలని అన్నారు. భారత్తో పాటు శ్రీలంక, మాల్దీవులు, ఇండోనేసియాలో పర్యటించనున్నారు పాంపియో.
భారత్- అమెరికా మొదటి దఫా 2+2 చర్చలు 2018లో దిల్లీలో జరిగాయి. గతేడాది డిసెంబర్లో రెండో దఫా చర్చలు వాషింగ్టన్లో నిర్వహించారు.
ఇదీ చూడండి: దక్షిణ కొరియా ప్రధానితో మోదీ సంభాషణ
