భారతదేశాన్ని అమెరికా ఎంతగానో ప్రేమిస్తుందని, గౌరవిస్తుందని ఆ దేశాధ్యక్షుడు డొనాల్డ్ ట్రంప్ అన్నారు. రెండు రోజుల భారత పర్యటనలో భాగంగా అహ్మదాబాద్ మోటేరా స్టేడియంలో జరిగిన 'నమస్తే ట్రంప్' కార్యక్రమంలో జనసంద్రాన్ని ఉద్దేశించి ఆయన ప్రసంగించారు.
భారత సంస్కృతి, సంప్రదాయాలు, వ్యక్తిగత స్వేచ్ఛ, గౌరవాలు, చట్టాలు, సర్వమత సమానత్వాన్ని ట్రంప్ కొనియాడారు. ఇరుదేశాల రక్షణ, వాణిజ్య ఒప్పందాలపై కీలక వ్యాఖ్యలు చేశారు. ఇస్లామిక్ తీవ్రవాదం నుంచి ప్రజలను కాపాడేందుకు ఇరుదేశాలు కట్టుబడి ఉన్నాయని ఉద్ఘాటించారు ట్రంప్.
"ఉగ్రవాదులను అడ్డుకుని, వారి సిద్ధాంతాలపై పోరాడటానికి అమెరికా-భారత్ కట్టుబడి ఉన్నాయి. ఇదే విషయమై.. నేను అధ్యక్ష పదవి చేపట్టినప్పటి నుంచి మా అధికార యంత్రాంగం పాకిస్థాన్తో చర్చలు జరుపుతోంది. పాక్తో కలిసి ఉగ్రవాద సంస్థలను అరికట్టి, ఆ దేశ సరిహద్దు కేంద్రంగా పనిచేసే ఉగ్రమూకలను తరిమికొట్టే విధంగా మేము ముందడుగు వేస్తున్నాం. ఈ చర్యల వల్ల పాకిస్థాన్లో సానుకూల స్పందనలు కనపడుతున్నాయి. భవిష్యత్తులో దక్షిణాసియాలో ఉద్రిక్తతలు తగ్గి, శాంతి భద్రతలు మెరుగుపడతాయని ఆశిస్తున్నాం. ఈ విషయంలో భారత్ నాయకత్వ పాత్ర ఎంతో అవసరం."
- డొనాల్డ్ ట్రంప్, అమెరికా అధ్యక్షుడు.
రక్షణ రంగంపై...
ఇరుదేశాల మధ్య జరగబోయే రక్షణ ఒప్పందాలను ట్రంప్ ప్రస్తావించారు. భారత్-అమెరికా మధ్య 3 బిలియన్ డాలర్ల విలువైన రక్షణ ఒప్పందాలపై రేపు సంతకం చేయనున్నట్లు ప్రకటించారు. భారత్కు అమెరికా అతిపెద్ద రక్షణ భాగస్వామిగా నిలుస్తుందన్నారు.
"మన మధ్య ఉన్న రక్షణ రంగ సహకారాన్ని మరింత బలోపేతం చేసేందుకు.. ప్రపంచంలోనే అత్యాధునిక మిలిటరీ సామగ్రిని భారత్కు అందించేందుకు సిద్ధంగా ఉన్నాం. మేము గొప్ప ఆయుధాలు తయారు చేస్తున్నాం. అందులో విమానాలు, క్షిపణులు, రాకెట్లు, నౌకలు ఉన్నాయి. ఇప్పుడు భారత్తో ఒప్పందం చేసుకోవాలనుకుంటున్నాం. ఈ ఒప్పందంలో అత్యాధునిక ఎయిర్ డిఫెన్స్ సిస్టమ్స్, ఆయుధాలు కలిగిన, సాధారణ విహంగాలు ఉన్నాయి. భారత రక్షణ విభాగానికి సుమారు 3 బిలియన్ డాలర్ల విలువైన హెలికాఫ్టర్లు, ఇతర యుద్ధ సామగ్రిని అందించే ఒప్పందంపై రేపు నేను సంతకం చేయబోతున్నా."
- డొనాల్డ్ ట్రంప్, అమెరికా అధ్యక్షుడు
బ్రహ్మాండమైన వాణిజ్య ఒప్పందం...
భారత్-అమెరికా వాణిజ్య సంబంధాల బలోపేతానికి ప్రయత్నిస్తున్నామని పేర్కొన్నారు అగ్రరాజ్య అధ్యక్షుడు డొనాల్డ్ ట్రంప్. వాణిజ్య ఒప్పందానికి అడ్డంకులు తొలగించే చర్చలు ప్రారంభ దశలో ఉన్నాయన్నారు. ఎన్నడూ లేని విధంగా ఒక గొప్ప ఒప్పందం కుదుర్చుకుంటామని విశ్వాసం వ్యక్తంచేశారు.
భారత భిన్న సంస్కృతి, సంప్రదాయాలు, క్లాసిక్ సినిమాలు, బాంగ్రా నృత్యాలు, పండుగలు వంటి అనేక విషయాల గురించి మాట్లాడారు ట్రంప్. దిగ్గజ క్రికెటర్లు సచిన్, విరాట్ కోహ్లీ గురించి ప్రస్తావించారు.
భారత్కు నమ్మకమైన స్నేహితుడిగా అమెరికా ఉంటుందని ట్రంప్ హామీ ఇచ్చారు. ప్రధాని నరేంద్ర మోదీని గొప్ప నాయకుడిగా, తన మిత్రుడిగా అభివర్ణించారు.
- ఇదీ చూడండి: 'భారత్-అమెరికా మైత్రిలో సరికొత్త అధ్యాయం'
