కర్తార్పుర్ నడవా నిర్మాణంపై భారత్-పాక్ అధికారులు మరోసారి సమావేశం కానున్నారు. ఈనెల 14న వాఘా సరిహద్దులో చర్చలు జరపనున్నారు. భద్రతా పరమైన అంశాలతో పాటు నడవా ద్వారా ఎంతమంది భక్తులను అనుమతించాలన్న అంశాలపై ప్రధానంగా దృష్టిసారించే అవకాశాలున్నట్లు తెలుస్తోంది. నడవా విధివిధానాలు, సాంకేతిక సమస్యలపైనా చర్చలు జరపనున్నారు.
అక్టోబర్ 31కి పూర్తి...
కర్తార్పుర్ నడవా నిర్మాణం పూర్తయితే పంజాబ్ గురుదాస్‌పుర్ నుంచి... సిక్కులు అత్యంత పవిత్రమైన ప్రాంతంగా భావించే పాకిస్థాన్ కర్తార్పుర్‌లోని గురుద్వారా దాదర్ సాహిబ్కు నేరుగా రాకపోకలు సాగించొచ్చు. అందుకే గురునానక్ 550వ జన్మదినోత్సవమైన 2019, నవంబర్ 12 లోపు కర్తార్పుర్ ప్రాజెక్టును పూర్తి చేసేందుకు భారత్ ప్రయత్నాలు ముమ్మరం చేసింది. అక్టోబర్ 31 నాటికి నడవా నిర్మాణం పూర్తి చేసేందుకు రూ. 500 కోట్లకు పైగా కేటాయించనున్నట్లు సమాచారం.
ప్రత్యేక సందర్భాల్లో 10 వేల మంది భక్తులు, సాధారణ రోజుల్లో 5 వేల మందిని పాక్ పంపించేందుకు కృషి చేస్తోంది. యాత్ర పొడవునా బలమైన భద్రత కోసం అధునాతన నిఘా వ్యవస్థను ఉపయోగించనుంది.
గతేడాది శంకుస్థాపన
కర్తార్పుర్ నడవాకు ఉపరాష్ట్రపతి వెంకయ్యనాయుడు, పంజాబ్ ముఖ్యమంత్రి అమరీందర్ సింగ్ గతేడాది నవంబర్ 26న పంజాబ్లోని గురుదాస్పుర్లో శంకుస్థాపన చేశారు.
