భారత్-జపాన్ అనుబంధం గురువారం మరో మైలురాయిని చేరింది. ఎన్నో ఏళ్ల పాటు సాగిన సంప్రదింపుల అనంతరం రక్షణ రంగంలో కీలక ఒప్పందం కుదుర్చుకున్నాయి ఇరు దేశాలు. ఈ ఒప్పందం ద్వారా.. భారత్-జపాన్ సైన్యాలు లాజిస్టిక్స్పరంగా పరస్పర సహకారం పొందవచ్చు. ఆసియాలో చైనా ప్రాబల్యం పెరుగుతున్న తరుణంలో ఈ కీలక ఒప్పందానికి ప్రాధాన్యం ఏర్పడింది.
రక్షణశాఖ కార్యదర్శి అజయ్ కుమార్, జపాన్ రాయబారి సుజుకి సతోషి ఈ ఒప్పందంపై సంతకాలు చేసినట్టు రక్షణశాఖ వెల్లడించింది. ఈ ఒప్పందంతో ఇరు దేశాల మధ్య రక్షణ రంగంలో సహకారం మరింత బలపడుతుందని, మరమ్మతులు, ఇతర అవసరాల కోసం ఒక దేశ సైనిక శిబిరాన్ని మరో దేశం వినియోగించుకోవచ్చని పేర్కొంది.
అబేకు మోదీ ఫోన్...
ఈ నేపథ్యంలో జపాన్ ప్రధాని షింజో అబేతో ప్రధానమంత్రి నరేంద్ర మోదీ ఫోన్లో సంభాషించారు. ఈ "అగ్రిమెంట్ ఆన్ రెసిప్రోకల్ ప్రొవిజన్ ఆఫ్ సప్లైస్ అండ్ సర్వీసెస్" ఒప్పందం కుదరడాన్ని ఇరువురు స్వాగతించారు. దీంతో రక్షణ రంగంలో ఇరు దేశాల సహకారం మరింత శక్తిమంతంగా మారుతుందని ఆశాభావం వ్యక్తం చేశారు.
జపాన్ అభివృద్ధిలో అబే పాత్రను ప్రశంసించారు ప్రధాని మోదీ. భారత్-జపాన్ మైత్రి బలపడటంలోనూ షింజో అబే నాయకత్వం కీలక పాత్ర పోషించిందని కొనియాడారు. అనారోగ్య కారణాల వల్ల తన పదవికి రాజీనామా చేస్తున్నట్టు జపాన్ ప్రధాని ఇటీవలే ప్రకటించిన నేపథ్యంలో మోదీ ఈ వ్యాఖ్యలు చేశారు.
ఇదీ చూడండి:- భారత్‌కు అబె... ఓ మంచి నేస్తం!
