కరోనా వ్యాప్తి విషయంలో భారత్ కట్టుదిట్టంగా వ్వవహరిస్తున్నట్లు కనిపిస్తోంది. లాక్డౌన్ వల్ల కొవిడ్ వ్యాప్తిని బాగా అరికట్టగలిగినట్లు పేర్కొంది కేంద్ర ఆరోగ్య మంత్రిత్వశాఖ. దేశంలో ప్రతి లక్ష మందిలో 7.1 మందికి మహమ్మారి సోకినట్లు తెలిపింది. ప్రపంచవ్యాప్తంగా చూస్తే ఈ సంఖ్య 60కి చేరిందని స్పష్టం చేసింది. వైరస్ నియంత్రణ కోసం ప్రభుత్వం తీసుకున్న ముందస్తు చర్యలు సత్పలితాలిచ్చినట్లు వెల్లడించింది.
ఇప్పటివరకు ప్రపంచవ్యాప్తంగా 40 లక్షలకు పైగా కేసులు నమోదయ్యాయి. భారత్లో 96,169 మంది వైరస్ బారిన పడ్డారు.
"దేశంలో ప్రస్తుతం 56,316 యాక్టివ్ కేసులున్నాయి. ఇప్పటివరకు 36,824 మంది మహమ్మారి నుంచి కోలుకున్నారు. గడిచిన 24 గంటల్లో మొత్తం 2,715 మందికి వైరస్ నయమైంది. ప్రస్తుతం రికవరీ రేటు 38.29 శాతంగా ఉంది".
కేంద్ర ఆరోగ్య మంత్రిత్వశాఖ
మే 31 వరకు లాక్డౌన్ పొడిగిస్తూ.. రాష్ట్రాలకు, కేంద్రపాలిత ప్రాంతాలకు ఆదివారం నూతన మార్గదర్శకాలు జారీ చేసింది కేంద్రం. రెడ్, గ్రీన్, ఆరెంజ్ జోన్ల నిర్ణాయాధికారం రాష్ట్రాలకే అప్పగించింది. అంతర్ రాష్ట్ర బస్సులకు అనుమతిచ్చింది. విమానాలు, రైళ్లు, మెట్రో సేవలపై నిషేధం కొనసాగించింది.
