ఇతర దేశాల్లో వ్యాక్సిన్ల తయారీ ఇంకా ప్రయోగ దశలో ఉందని.. స్వల్ప వ్యవధిలోనే కరోనా టీకాను తయారు చేయడం ద్వారా భారతదేశ సత్తాను ప్రపంచం గుర్తించిందని తెలిపారు నీతి ఆయోగ్ సభ్యుడు వీకే పాల్. ఫలితంగా 'ఆత్మనిర్భర్ భారత్'లో భాగంగా దేశ ప్రజల రక్షణలో గొప్ప ముందడుగు పడిందన్నారు.
సుమారు 3 కోట్ల మంది కరోనా యోధులకు( ఫ్రంట్లైన్ వర్కర్లకు) టీకా పంపిణీ లక్ష్యంగా మొదటి దశ వ్యాక్సిన్ డ్రైవ్ను ప్రధాని నరేంద్ర మోదీ ప్రారంభించారని వీకే పాల్ తెలిపారు. దిల్లీలోని ఎయిమ్స్లో శనివారం ఆయన కరోనా టీకా వేయించుకున్నారు.
అపోహలొద్దు..
అతి తక్కువ సమయంలోనే కరోనా వ్యాక్సిన్లు తయారు చేసి సాంకేతికతలో ముందున్నామని నిరూపించామని.. దేశీయంగా తయారైన రెండు టీకాలు అనుమతి పొందడం గొప్ప విషయమని వీకే పాల్ అన్నారు. టీకాలు వేయించుకునేందుకు ప్రజలు ముందుకు రావాలని కోరారు. కరోనా తీవ్రతను గుర్తించి టీకా ప్రయోజనం పొందాలని విజ్ఞప్తి చేశారు.
అనేక ప్రయోగాలు, వేల మందిపై ట్రయల్స్ జరిపిన తరువాతే ఈ టీకాల విడుదలయ్యాయి. ప్రతికూల పరిస్థితుల్లో పరిశోధనలు నిర్వహించిన శాస్త్రవేత్తలను గౌరవిద్దాం. ప్రస్తుతం మనకు రెండు గొప్ప టీకాలు అందుబాటులో ఉన్నాయి. మీకు ఏ టీకా కేటాయించినా వద్దనకుండా తీసుకోండి.
-వీకే పాల్, నీతి ఆయోగ్ సభ్యుడు.
ఇదీ చదవండి: భారత్లో టీకా పంపిణీ- తొలిరోజు విజయవంతం
