హిందూ మహా సముద్రంలో నిఘా పెంచిన భారత్​

హిందూ మహా సముద్రంలో భారత నావికా దళం నిఘా పెంచింది. ఆ ప్రాంతంలో చైనా కార్యకలాపాలను పర్యవేక్షించడానికే ఈ చర్యలు చేపట్టినట్టు తెలుస్తోంది.

చైనా కార్యకలాపాలను ట్రాక్​ చేసేందుకు హిందూ మహా సముద్ర ప్రాంతంలో నిఘా వ్యవస్థను పెంచింది భారత్​. దాదాపు రెండు నెలలుగా సరిహద్దులో నెలకొన్న ఉద్రిక్త వాతావరణం నేపథ్యంలో భారత్​ తీసుకున్న నిర్ణయానికి ప్రాధాన్యత సంతరించుకుంది. నిఘా పెంచడం సహా బలగాల మోహరింపు కూడా చేపట్టినట్టు తెలుస్తోంది.

ఇదే క్రమంలో మిత్రపక్షాలైన అమెరికా నావికా దళం, జపాన్​ స్వీయ రక్షణ దళాలతో భారత నావికా దళం​ కలిసి పనిచేస్తోంది.

గత శనివారం జపాన్​ నావికా దళంతో హిందూ మహా సముద్ర ప్రాంతంలో విన్యాసాలు చేపట్టింది భారత నావికా దళం. ఐఎన్​ఎస్​ రాణా, ఐఎన్​ఎస్​ విక్రాంత్​లు ఇందులో పాల్గొన్నాయి. ఈ ప్రాంతంలోనే చైనా నౌకలు తరచూ కనిపిస్తుండటం గమనార్హం.

హిందూ మహా సముద్రంలో చైనా తన ఆధిపత్యాన్ని ప్రదర్శించడానికి ప్రయత్నిస్తోంది. ఈ నేపథ్యంలో చైనాకు అడ్డుకట్ట వేసే విధంగా అమెరికా, ఆస్ట్రేలియా, జపాన్​, ఫ్రాన్స్​, భారత నావికా దళాలు తమ మధ్య ఉన్న బంధాన్ని బలపర్చుకుంటున్నాయి.

ఇదీ చూడండి:- 'హిందూ మహా సముద్రంలోనూ చైనా కుట్రలు'