'ఆ నినాదం ట్రంప్​దే.. మోదీ గుర్తుచేశారంతే'

మోదీ నోటి వెంట వచ్చిన 'అబ్​కీ బార్​ ట్రంప్​ సర్కార్​' నినాదంపై వివరణ ఇచ్చారు విదేశాంగ మంత్రి జై​శంకర్​. ఆ నినాదం ట్రంప్​ చేసినదేనని.. దానినే ప్రధాని గుర్తుచేశారని తెలిపారు. దీనిపై స్పందించిన రాహుల్​ గాంధీ.. మోదీ వ్యాఖ్యలను కప్పిపుచ్చుతున్నారని మండిపడ్డారు. మోదీకి దౌత్య విధానాలను నేర్పించాలని సూచించారు.

ఇతర దేశాల రాజకీయాలపై భారత్ నిష్పక్షపాత వైఖరి అవలంబిస్తుందని స్పష్టంచేశారు విదేశాంగ మంత్రి జైశంకర్. హ్యూస్టన్ 'హౌడీ మోదీ' సభలో ప్రధానమంత్రి నరేంద్ర మోదీ చేసిన 'అబ్​ కీ బార్​ ట్రంప్​ సర్కార్​' నినాదంపై వివరణ ఇచ్చారు విదేశాంగ మంత్రి​. అమెరికాలోని భారతీయ సంఘాలకు దగ్గరవ్వడానికి అధ్యక్ష ఎన్నికల ప్రచారంలో డొనాల్డ్​ ట్రంప్​ ఈ నినాదాన్ని ఉపయోగించారని.. తాజాగా దానినే మోదీ గుర్తుచేశారని జై​శంకర్​ చెప్పారు.

ప్రస్తుతం మూడు రోజల అమెరికా పర్యటనలో ఉన్నారు జై​శంకర్​. 2020 అమెరికా అధ్యక్ష ఎన్నికల కోసం ట్రంప్​ తరఫున మోదీ ప్రచారం చేస్తున్నారన్న ఆరోపణలను ఖండించారు.

"మోదీ అన్న వ్యాఖ్యలను సరిగ్గా పరిశీలించండి. ట్రంప్​ ఉపయోగించిన నినాదాన్నే మోదీ గుర్తుచేశారు. ప్రధాని వ్యాఖ్యలను అపార్థం చేసుకోకూడదు. ఆయన మాటలపై మోదీకి స్పష్టత ఉంది. అధ్యక్ష అభ్యర్థిగా ఉన్నప్పుడే భారతీయులకు దగ్గరవ్వడానికి ట్రంప్​ ఈ నినాదం చేశారని మోదీ అన్నారు. దీనిపై ఎలాంటి దుష్ప్రచారం చేయకూడదు."
--- జై​శంకర్​, విదేశాంగ మంత్రి.

'కప్పిపుచ్చినందుకు ధన్యవాదాలు..'

జై​శంకర్​ వివరణపై కాంగ్రెస్​ నేత రాహుల్​ గాంధీ వ్యంగ్యాస్త్రాలు సంధించారు. మోదీ వ్యాఖ్యలను కప్పిపుచ్చినందుకు ధన్యవాదాలు తెలిపారు. ప్రధానికి దౌత్య విధానాలు నేర్పించాలని.. సూచిస్తూ ట్వీట్​ చేశారు.

హౌడీ-మోదీలో 'అబ్​-కీ-బార్​ ట్రంప్​ సర్కార్​' అంటూ భారత్​కు అమెరికాలోని డెమొక్రాట్లతో సమస్యలు తెచ్చిపెట్టారని విమర్శించారు రాహుల్​.

ఇదీ చూడండి:- 'దాగుడు మూతలు ఉండవు.. దాటాలనుకుంటే దాటేస్తాం'