ఆసియాలో కరోనా మహమ్మారి తీవ్రంగా ఉన్న దేశాల్లో భారత్ మొదటిస్థానంలో ఉంది. ప్రపంచవ్యాప్తంగా రోజువారీ కేసుల్లో 30 శాతం, మరణాల్లో 20 శాతం భారత్లోనే నమోదవుతున్నాయని భారత ప్రజారోగ్య సంఘం (ఐపీహెచ్ఏ) నిపుణులు వెల్లడించారు.
'భారత్లో కొవిడ్-19'పై మూడో సంయుక్త ప్రకటన చేసింది ఐపీహెచ్ఏ టాస్క్ఫోర్స్ బృందం. అయితే, దేశంలో కరోనా సంక్షోభం తారస్థాయికి చేరుకోలేదని తెలిపింది. దేశంలో ఆగస్టు 16 నాటికి కరోనా నుంచి 23 లక్షల (ప్రస్తుతం 28 లక్షలు) మంది కోలుకున్నారని, మరణాల రేటు కూడా క్రమంగా తగ్గుముఖం పడుతోందని వివరించింది.
"దేశంలో ఆగస్టు 16 నాటికి 7 లక్షల క్రియాశీల కేసులు ఉన్నాయి. పునరుత్పత్తి రేటు 1.06గా ఉంది. అంటే, దేశంలో కరోనా విపత్తు తారస్థాయికి చేరుకోలేదు. అయితే, కరోనా మహమ్మారి ప్రతిస్పందనకు పూర్తి ఆరోగ్య వ్యవస్థను వినియోగించటం వల్ల ఇతర జాతీయ వైద్య కార్యక్రమాలపై పరిమితమైన దృష్టి సారించారు."
- టాస్క్ఫోర్స్ నివేదిక
దేశంలోని చిన్న పట్టణాలు, గ్రామాల్లోనూ పాజిటివ్ కేసులు నమోదవుతున్నాయని ఈ నివేదిక పేర్కొంది. చాలా ప్రాంతాల్లో సామాజిక వ్యాప్తి మొదలైనట్లు సెరో సర్వేలు బయటపెట్టినట్లు వివరించింది. వీటి ప్రకారం.. అంచనా వేసిన కేసుల్లో 5 శాతమే గుర్తించగలుగుతున్నామని తెలిపింది.
అన్లాక్ నుంచి..
భారత్లో అన్లాక్ ప్రక్రియ మొదలైన నాటి నుంచి రోజువారీ కేసుల సంఖ్య భారీగా పెరుగుతోంది. జూన్ 5న 9 వేల కేసులు నమోదు కాగా, ఆగస్టు 23 నాటికి ఈ సంఖ్య 61 వేలకు చేరింది. ప్రతి 10 లక్షల మందిలో 2,251 మందికి వైరస్ సోకింది.
టాస్క్ఫోర్స్..
భారత్లోని ప్రముఖ ప్రజారోగ్య నిపుణుల సంయుక్త టాస్క్పోర్స్ను 2020 ఏప్రిల్లో నియమించింది ఐపీహెచ్ఏ. మహమ్మారిపై కేంద్రానికి సలహాలు ఇచ్చేందుకు ఇండియన్ అసోసియేషన్ ఆఫ్ ప్రివెంటివ్ అండ్ సోషల్ మెడిసిన్ (ఐఏపీఎస్ఎం) ఏర్పాటు చేసింది.
ఇదీ చూడండి: దేశంలో కొత్తగా 69,921 కేసులు.. 819 మరణాలు
