భారత్-రష్యా మధ్య మైత్రి మరింత బలోపేతం అవుతుందన్నారు ప్రధాని నరేంద్ర మోదీ. తూర్పు ప్రాంతాల అభివృద్ధి కోసం రష్యాకు ఒక బిలియన్ అమెరికన్ డాలర్లను అప్పుగా ఇస్తున్నట్లు వ్లాదివోస్తోక్లో తూర్పు ఆర్థిక వేదిక సదస్సులో ప్రకటించారు. భారత్, రష్యాల మధ్య స్నేహం కేవలం ప్రభుత్వాలకే పరిమితం కాలేదని..., ఇరు దేశాల ప్రజలు, వాణిజ్య సంబంధాలతో ముడిపడి ఉందని తెలిపారు మోదీ. 'యాక్ట్‌ ఈస్ట్‌' పాలసీ కింద తూర్పు ఆసియా అభివృద్ధికి తాము కట్టుబడి ఉన్నామన్నారు .
తూర్పు ఆర్థిక వేదిక కార్యకలాపాల్లో భారత్ కీలక భాగస్వామిగా ఉందన్నారు ప్రధాని. రష్యా చమురు, గ్యాస్‌ పరిశ్రమల్లో భారతీయ సంస్థలు ఏడు బిలియన్ అమెరికన్ డాలర్ల మేర పెట్టబడులు పెట్టినట్లు వివరించారు.
"ప్రవాస భారతీయుల శ్రమ, నైపుణ్యం తమ దేశాలకు ఎంతో ఉపయోగపడుతుందని ఆ ప్రాంత నాయకులు నన్ను కలిసినపుడు చెబుతారు. భారతీయ సంస్థలు ప్రపంచంలో చాలా ప్రాంతాల ఆర్థిక అభివృద్ధికి దోహదపడుతున్నాయి. భారతీయుల పెట్టుబడులు, ప్రతిభ, వృత్తి నైపుణ్యం తూర్పు దేశాల వికాసానికి ఉపయోగపడతాయని విశ్వసిస్తున్నా. తూర్పు ఆర్థిక వేదిక సదస్సులో భారత్ కీలక భాగస్వామిగా ఉంది. ఈ బంధం మరింత బలోపేతం అయ్యేందుకు ఈ ప్రాంత నాయకులందరినీ భారత్ రావాలని కోరుతున్నా. "
-ప్రధాని నరేంద్ర మోదీ.
ఇదీ చూడండి: 'ఆర్థిక వ్యవస్థ కొత్త పుంతలు తొక్కేలా నవ్యావిష్కరణలు'
