ఆన్లైన్ కిరాణా షాపింగ్లో ఆసియాలోకెల్లా భారతదేశం శరవేగంగా దూసుకుపోతున్నట్లు ఐజీడీ ఆసియా సంస్థ సర్వేలో తేలింది. దేశంలో మౌలిక సదుపాయాలు అనుకూలిస్తున్నందున ఆన్లైన్ మార్కెట్లో పెట్టుబడులు విపరీతంగా పెరగడమే ఇందుకు కారణమని తెలిపింది ఆ సంస్థ . అధిక జనాభాకు తగ్గట్టుగా సరికొత్త చెల్లింపు విధానాలతో వచ్చే ఐదేళ్లలో భారత్లో ఆన్లైన్ మార్కెట్ వేగంగా పుంజుకుంటుందని అంచనా వేసింది.
ఆసియాలోని మొదటి 12 ఆన్లైన్ కిరాణా మార్కెట్లలో భారత్, చైనా, తైవాన్, దక్షిణ కొరియా, ఇండోనేషియా, థాయ్ల్యాండ్, సింగపూర్లు ఉన్నాయి.
ఐజీడీ అంచనా ప్రకారం భారత ఈ-కామర్స్ మార్కెట్ 2022కల్లా 32.7 బిలియన్ డాలర్ల నుంచి 71.9 బిలియన్ డాలర్లకు పెరిగే అవకాశముంది.
చిల్లర వ్యాపారులకు 'ఆన్లైన్' ముప్పు?
దేశంలో ఆన్లైన్ షాపింగ్కు ఆదరణ పెరుగుతున్న తరుణంలో చిల్లర వర్తకుల పరిస్థితి దయనీయంగా మారుతోంది. అందుకే ప్రభుత్వం ఇటీవల ఆన్లైన్ వ్యాపార నియంత్రణ చట్టాలు తీసుకొచ్చింది. భాగస్వామ్య కంపెనీల ఉత్పత్తులను అమ్మకూడదని అమెజాన్ వంటి కంపెనీలపై ఆంక్షలు విధించింది. ఈ నియమాల కారణంగా ఆన్లైన్ మార్కెట్ వృద్ధి కాస్త నెమ్మదించే అవకాశం ఉందని అంచనా వేసింది ఐజీడీ.
