'టీకా పంపిణీలో పాల్గొందాం- వారి కృషి అమోఘం'

ఇండియన్‌ మెడికల్‌ అసోసియేషన్‌(ఐఎంఏ)లో సభ్యులైన ప్రతీ ఒక్కరూ కరోనా టీకా పంపిణీలో పాల్గొని తమవంతు సహకారం అందించాలని ఆ సంస్థ విజ్ఞప్తి చేసింది. ప్రతీ ఒక్కరికీ టీకా అందేలా చూడాల్సిన బాధ్యత తమపై ఉందని తెలిపింది.

ప్రపంచంలోనే అతిపెద్ద టీకా కార్యక్రమం భారత్​లో ప్రారంభమవుతున్న నేపథ్యంలో ఇండియన్‌ మెడికల్‌ అసోసియేషన్(ఐఎంఏ)‌ సభ్యులు చురుకుగా సేవలందించాలని ఆ సంస్థ కోరింది. పంపిణీ క్రతువులో సభ్యులంతా భాగస్వామ్యులు కావాలని ఒక ప్రకటనలో తెలిపింది.

వారి శ్రమ అపారం..

కొవిడ్​-19 టీకాను దేశీయంగా అభివృద్ధి చేసేందుకు భారతీయ వైద్య పరిశోధన మండలి (ఐసీఎంఆర్​), నేషనల్​ ఇనిస్టిట్యూట్ ఆఫ్​ వైరాలజీ సహా.. అనేకమంది శాస్త్రవేత్తలు తీవ్రంగా శ్రమించారని ఐఎంఏ గుర్తుచేసింది. పరిశోధకులు, శాస్త్రవేత్తల శ్రమను అభినందించాల్సిందేనని ఒక ప్రకటనలో పేర్కొంది. ప్రజల కలల్ని సాకారం చేస్తూ.. టీకాల విషయంలో స్వయం సమృద్ధి సాధించేందుకు శాస్త్రవేత్తలు దోహదం చేశారని కొనియాడింది.

అపోహల నివృత్తికి కృషి..

అందుబాటు ధరల్లో లభించే కొవిషీల్డ్​,​ కొవాగ్జిన్​ టీకాలు.. ఉత్తమ పనితీరు ప్రదర్శిస్తాయని ఐఎంఏ ఆశాభావం వ్యక్తం చేసింది. ఇవి దేశ జనాభాకు గొప్ప ఉపశమనాన్ని ఇస్తాయని పేర్కొంది. టీకాలపై ప్రజల్లో ఉన్న అపోహలు తొలగించి.. సామాజిక మాధ్యమాల్లో అవాస్తవాల ప్రచారానికి అడ్డుకట్ట వేసేందుకు నిరంతరం కృషి చేయనున్నట్టు ఐఎంఏ తెలిపింది.

ఇదీ చదవండి: దేశంలో 82కు చేరిన కొత్త కరోనా కేసులు