చైనా నుంచి మరో వైరస్ ముప్పును భారత్ ఎదుర్కొనే అవకాశం ఉందని భారత వైద్య పరిశోధన మండలి (ఐసీఎంఆర్) హెచ్చరించింది. దీని పేరు 'క్యాట్ క్యూ వైరస్' అని తెలిపింది. జ్వరం, తలనొప్పి సంబంధమైన అనారోగ్య లక్షణాలతో పాటు మెదడు వాపు వ్యాధి వచ్చే అవకాశం ఉందని తెలుస్తోంది.
ఆర్దోపోడ్‌ వర్గానికి చెందిన జీవులను వాహకాలుగా వాడుకొని ఈ వైరస్ వ్యాపిస్తుందని ఐసీఎంఆర్ తెలిపింది. చైనా, తైవాన్‌ వెలుగు చూసిన వైరస్.. క్యూలెక్స్ జాతి దోమలు, పందులను ఈ వైర్‌సలు ఆవాసాలుగా మార్చుకుంటాయని ఐసీఎంఆర్ స్పష్టం చేసింది. మన దేశంలోనూ పందులు, క్యూలెక్స్ దోమలు క్యాట్ క్యూ వైరస్కు ప్రాథమిక వాహకాలుగా పనిచేస్తాయని పేర్కొన్నారు.
ఇద్దరిలో యాంటీబాడీలు..
దేశవ్యాప్తంగా సేకరించిన 883 శాంపిళ్లలో రెండు నమూనాల్లో క్యాట్ క్యూ వైరస్కు ఐజీజీ యాంటీబాడీలు ఉన్నట్లు పుణెలోని నేషనల్‌ ఇన్‌స్టిట్యూట్‌ ఆఫ్‌ వైరాలజీ (ఎన్‌ఐవీ) శాస్త్రవేత్తలు గుర్తించారు. అయితే శాంపిళ్లలో నేరుగా వైరస్ జాడను తాము గుర్తించలేదని ఎన్‌ఐవీ శాస్త్రవేత్తలు స్పష్టంచేశారు. ప్రస్తుతం ఈ వైరస్ ఎంతమందిలో ఉన్నది తెలియాలంటే.. మరిన్ని శాంపిళ్లను పరీక్షించాల్సి ఉంటుందన్నారు.
వీటితోపాటు ఏజిప్టీ, క్యూలెక్స్ క్విన్‌క్వేఫాషియేటస్‌, క్యూలెక్స్ ట్రైటేనియోరైన్‌కస్‌ జాతుల దోమల ద్వారా వైరస్ ఒకరి నుంచి మరొకరికి వ్యాపించొచ్చని ఐసీఎంఆర్ అధ్యయనంలో వెల్లడైంది. ఈ నేపథ్యంలో మనుషులతో పాటు పందులు, ఇతర జంతువుల శాంపిళ్లనూ సేకరించి పరీక్షిస్తామని తెలిపారు.
ఇదీ చూడండి: 'కరోనా పరీక్షలు, టీకా కోసం 3500 కోట్ల డాలర్లు అవసరం'
