భారత దేశంలో పోషకాహారానికి నోచుకోలేక ప్రతి సంవత్సరం కొన్ని వేల మంది మృతి చెందుతున్నారని ప్రఖ్యాత పరిశోధన సంస్థ లాన్సెట్ అధ్యయనంలో తేలింది. ప్రపంచవ్యాప్తంగా సగటున ప్రతి ఐదుగురిలో ఒక్కరు పోషకాహార లేమి కారణంగా చనిపోతున్నారని నివేదికలో వెల్లడించింది.
1990 నుంచి 2017 వరకు 195 దేశాల్లో 15 ఆహారపు అలవాట్లపై పరిశోధనలు జరిపి తుది నివేదిక రూపొందించింది లాన్సెట్. ఈ 27 ఏళ్ల వ్యవధిలో ప్రపంచ వ్యాప్తంగా దాదాపు కోటీ పది లక్షల మందికిపైగా సరైన భోజనం లేక మరణించారని తెలిపింది. చాలా మంది దీర్ఘకాలిక రోగాల బారిన పడుతున్నారని నివేదికలో పేర్కొంది.
పోషక విలువలు గల తృణధాన్యాలు, పండ్లు, గింజలు వంటి ఆహార పదార్థాలు భోజనంలో తక్కువ ఉండటం కారణంగా 2017లో ఎక్కువ మరణాలు సంభవించాయి.
భారత్ సహా అమెరికా, రష్యా, బ్రెజిల్, పాకిస్థాన్, నైజీరియా దేశాల్లో వేల మంది రోజుకు కనీసం 125 గ్రాముల తృణధాన్యాలకు నోచుకోకుండా దీర్ఘకాలిక వ్యాధులకు గురై, మృత్యువాత పడుతున్నారు.
పోషకాహార లేమి కారణంగా తక్కువ మరణాలు సంభవించిన దేశాల జాబితాలో ఇజ్రాయెల్, ఫ్రాన్స్, స్పెయిన్, జపాన్ ఉన్నాయి. సగటున లక్షమందిలో 310 మరణాలతో భారత్ 118వ స్థానంలో ఉంది.
ప్రపంచ దేశాలు పరస్పర సహకారంతో ఈ సమస్యను అధిగమించాల్సిన అవసరముందని అమెరికా వాషింగ్టన్ యూనివర్సిటీ పరిశోధకులు తెలిపారు. పోషకాహార లేమి సమస్యను ఆహారపు అలవాట్లలో మార్పులు తీసుకువచ్చి పరిష్కరించవచ్చని సూచించారు.
ఇదీ చూడండి:'డాక్టర్... ఈ కోడిపిల్లకు హెల్ప్ చేయండి'
