మహారాష్ట్రలో కూటమి ప్రభుత్వ ఏర్పాటుకు రంగం సిద్ధమవుతున్న నేపథ్యంలో ఆ రాష్ట్ర గవర్నర్ మార్పుపై ఊహాగానాలు వెలువడుతున్నాయి. గవర్నర్ భగత్ సింగ్ కోశ్యారీని మారుస్తారని ప్రచారం సాగుతోంది.
ఆయన స్థానంలో రాజస్థాన్ గవర్నర్ కల్రాజ్ మిశ్రాకు అదనపు బాధ్యతలు అప్పగించే అవకాశాలు ఉన్నాయని పలువురు అంటున్నారు. ముఖ్యమంత్రిగా బాధ్యతలు చేపట్టబోతున్న శివసేన అధినేత ఉద్ధవ్ ఠాక్రే.. గవర్నర్ కోశ్యారీని కలిసిన కాసేపటికే ఈ ప్రచారం మొదలైంది.
కోశ్యారీ తీరుపై విమర్శలు..
మహా రాజకీయ నాటకంలో గవర్నర్ కోశ్యారీపై అనేక విమర్శలు వెల్లువెత్తాయి. ప్రభుత్వ ఏర్పాటుకు ఎన్సీపీకి ఇచ్చిన గడువు ముగియకముందే రాష్ట్రపతి పాలనకు కోశ్యారీ సిఫార్సు చేయడం చర్చనీయాంశమయింది.
ఆ తర్వాత భాజపాకు మద్దతిస్తానంటూ ఎన్సీపీ నేత అజిత్‌ పవార్‌ ముందుకు రాగానే.. రాత్రికి రాత్రి రాష్ట్రపతి పాలన ఎత్తివేశారు. ప్రభుత్వ ఏర్పాటుకు గవర్నర్ భాజపాను ఆహ్వానించడం, ముఖ్యమంత్రిగా దేవేంద్ర ఫడణవీస్‌ ప్రమాణస్వీకారం చేయడం క్షణాల్లో జరిగాయి. ఈ పరిణామాలతో గవర్నర్ తీరుపై మరోసారి విమర్శలు వెల్లువెత్తాయి. ఈ పరిస్థితుల్లో కోశ్యారీ మార్పుపై ఊహాగానాలు రావడం చర్చనీయాంశంగా మారింది.
ఇదీ చూడండి: ఉద్ధవ్ ప్రమాణ స్వీకారంపై బొంబాయి హైకోర్టు 'ఆందోళన'
