సాధారణంగా సెలవులు వస్తే క్షణం తీరిక లేకుండా తిరుగుతూ సందడి చేస్తుంటాం. కానీ కొవిడ్ -19ను అరికట్టడంలో భాగంగా ఇంట్లో ఉన్నన్ని రోజులు ఏం చేయాలో తెలియక విసుగు చెందుతాం. మరి ఈ సమయంలో విసుగు రాకుండా ఇంట్లో ఈ పనులు చేసుకోవడం వల్ల ఆనందంగా ఉండొచ్చని చెబుతున్నారు విశ్రాంత ఇంజినీరు కృష్ణాదిశేషు పెంటపాటి. మరి అవేంటో చూద్దామా!
"రానున్న మూడు వారాలు ఇంట్లో ఖాళీ ఉండేవారు భవిష్యత్తు ప్రణాళికలు రూపొందించుకోవాలి. ఇంట్లోనే వ్యాయామాలు చేసుకోవడం, ఇంటి ఆరు బయట మొక్కలు పెంచడం, కుటుంబ సభ్యులతో ప్రశాంతంగా మాట్లాడుకోవటం, పిల్లలకు ఎన్నో విషయాలు నేర్పడం వంటి పనులు చేయడం ఉత్తమం" అని అంటున్నారు కృష్ణాదిశేషు.
ఇంట్లో వ్యాయామాలు
ఎలాంటి పని లేకుండా ఇంట్లో ఉండడం చాలా కష్టం. ఈ సమయంలో మానసిక, శారీరక బలాన్ని పెంచుకోవడానికి ఉపయోగించేందుకు వ్యాయామం, యోగా చేయడం ఉత్తమం. తేలిక పాటి వ్యాయామాలు చేయడం వల్ల ఆరోగ్యానికి ఎంతో మంచిది. సంగీతం వింటూ సంతోషంగా గడిపేయండి.
జ్ఞాపకాలను గుర్తుచేసుకోండి
కుటుంబ సభ్యులంతా ఒక్క చోట ఉన్నప్పుడు పాత జ్ఞాపకాలను గుర్తుచేసుకుంటే ఆ ఆనందమే వేరు. ఇందుకు కుటుంబ సభ్యులు అంతా కలిసి దిగిన ఫోటోలు, పాఠశాలలు, కళాశాలలు, పెళ్లి నాటి ఫోటోలు చూడటం చాలా సంతోషాన్ని కలిగిస్తుంది. వాటిని మీ పిల్లలకు, వాళ్ల పిల్లలకు చూపించడం మరింత బాగుంటుంది. వీటి ద్వారా సంస్కృతి, సంప్రదాయాలు నేర్పొచ్చు.
భాగస్వామితో సరదాగా గడపండి
ఈ ఖాళీ సమయంలో భార్యాభర్తలు వివాహ ప్రారంభ రోజుల్ని గుర్తుచేసుకోండి. మీ జీవిత భాగస్వామిని ఎంచుకోవడానికి కారణాలు, వారిలో మీకు నచ్చిన విషయాలు మనసు విప్పి మాట్లాడుకోండి. మీ భార్యకు వంట, ఇంటి పనుల్లో సాయం చేస్తూ ఉండండి. భవిష్యత్తు ప్రణాళికలు పంచుకోండి. పనుల్లో ఒకరికి మరొకరు సాయం చేసుకోవడం వల్ల పిల్లలకు ఆదర్శంగా నిలుస్తారు.
మొక్కలను సంరక్షించండి
మనలో చాలామందికి మొక్కల పెంపకం చాలా ఇష్టమైన పని. కానీ చాలా మందికి ఇతర పనుల వల్ల సమయం కేటాయించలేరు. అలాంటి వారికి ఇదో మంచి అవకాశం. ఈ కరోనా లాక్డౌన్ సమయంలో మీ మొక్కల్ని జాగ్రత్తగా సంరక్షించుకోండి. వాటితో అధిక సమయాన్ని కేటాయించండి. కూరగాయలు, పూల మొక్కల్ని అధికంగా పెంచండి.
ఫోన్లో మాట్లాడండి..
సాధారణంగా పనుల్లో పడి స్నేహితులు, ఇతర కుటుంబసభ్యులతో మాట్లాడం కుదరదు. అలాంటి వారికి ఇప్పుడీ సమయం చాలా ఉపయోగపడుతుంది. స్నేహితులకు, కుటుంబసభ్యులకు ఫోన్లు చేసి మాట్లాడుతూ పాత జ్ఞాపకాలను గర్తుచేసుకోండి. కరోనా వైరస్ వ్యాప్తి నివారణకు తీసుకోవాల్సిన జాగ్రత్తలు సూచించండి.
పిల్లలతో సరదాగా...
అప్పట్లో ఉమ్మడి కుటుంబాలు అధికంగా ఉండేవి. ఇంట్లో ఎక్కువ మంది ఉండడం వల్ల సందడి సందడిగా ఉండేది. కానీ ఇప్పుడన్నీ చిన్న కుటుంబాలే. కనీసం సొంత పిల్లలతో మాట్లాడటానికి సమయం కేటాయించడం లేదు. అలాంటి వారికి ఇదో గొప్ప అవకాశం. మీ పిల్లలతో సరదాగా సమయాన్ని గడపండి. వారికి అనేక విషయాలు చెప్పడానికి ఇదే మంచి సమయం. మీ రోజుల్లో ఎలా ఉండే వారో చెప్పండి. కుటుంబాల విలువలు నేర్పండి.
కుటుంబానికీ కాస్త సమయం
అందరూ ఒకే ఇంట్లో ఉన్నా.. ఉద్యోగాలతో పెద్దలు, చదువులతో పిల్లలు బిజీ. కలుసుకొనే మాట్లాడేది చాలా తక్కువ. ఇక వారు కలిసి భోజనం చేయడం అనేది వారానికి, నెలకు ఒకసారి కూడా కష్టమే. అలాంటి వారు ఇప్పుడు రోజూ కలిసి భోజనం చేయడం, మాట్లాడుకోవడం చేయాలి. కుటుంబ సంరక్షణకు మీరు తీసుకొనే చర్యలు వ్యక్తం చేయండి. ఇంట్లో ఉన్నా సరే కరోనా వ్యాప్తికి తగిన జాగ్రత్తలు తీసుకోండి.
ఇంటిని శుభ్రపరచుకోండి
సాధారణంగా ఉద్యోగాల హడావుడిలో బట్టలు, వస్తువులు ఎక్కడ పడితే అక్కడ పడేస్తుంటాం. వాటిని సర్దుకునేందుకు ఈ సమయాన్ని బాగా ఉపయోగించుకోండి. బీరువాలు, అల్మారాల్లోని వస్తువులు, బట్టలు సర్దుకోండి. పనికిరాని, వాడని వస్తువులను వేరుచేయండి. అల్మరాలు, ఇంట్లో దుమ్ము , ధూళి పోగొట్టి శుభ్రం చేయండి.
ఎక్కువ సమయం చదవండి
చాలా మందికి పుస్తకాలు చదవడమంటే ఎంతో ఇష్టం. కానీ ఉద్యోగం బిజీలో పడి వాటిని అల్మారాలకే పరిమితం చేస్తారు. ఈ సమయంలో పుస్తకాలు ఉండే ప్రదేశాన్ని శుభ్రం చేసి వాటిని చక్కగా సర్దేయండి. మీకు నచ్చిన పుస్తకాలు తీసి చదువండి. నచ్చే పుస్తకాలు ఇంట్లో లేనట్లయితే ఆన్లైన్లో ఈ-బుక్స్ ద్వారా చదువుకోండి.
ఇదీ చదవండి: అయోధ్య రామ మందిర నిర్మాణంలో మరో అడుగు
