జాతిపిత మహాత్మాగాంధీపై వివాదాస్పద వ్యాఖ్యలు చేశారని ఆరోపణలు ఎదుర్కొంటున్న భాజపా ఎంపీ అనంత్కుమార్ హెగ్డే.. పార్టీ అధిష్ఠానానికి వివరణ ఇచ్చారు. ఈ మేరకు భాజపా అధ్యక్షుడు జేపీ నడ్డాతో పాటు పార్టీ క్రమశిక్షణా కమిటీకి సుదీర్ఘ వివరణతో లేఖ రాసిన హెగ్డే.. తన ప్రసంగంలో మహాత్మాగాంధీ పేరును ఎక్కడా ప్రస్తావించలేదని తెలిపారు. తాను చేశానని అంటున్న వ్యాఖ్యలు తప్పు అని స్పష్టం చేశారు. మహాత్మాగాంధీని తాను అవమానించలేదని, ఆయన నేతృత్వంలో సాగిన స్వాతంత్ర్య పోరాటాన్ని నాటకం అని అనలేదని వివరణ ఇచ్చారు.
అంతకు ముందు కూడా దీనిపై వివరణ ఇచ్చిన ఆయన స్వాతంత్య్రోద్యమం గురించి తప్పా.. ఏ ఉద్యమకారుడి గురించి తప్పుగా మాట్లాడలేదన్నారు. మీడియాలో వస్తున్న కథనాలు పూర్తిగా అవాస్తవమని.. తాను మాట్లాడని విషయాల గురించి తప్పుగా ప్రచారం చేస్తున్నారని పేర్కొన్నారు. శనివారం అనంత్ కుమార్ హెగ్డే చేసిన వ్యాఖ్యలపై పెద్ద దుమారం రేగినందున.. ఆయన వ్యాఖ్యలకు వివరణ ఇవ్వాలని భాజపా సోమవారం షోకాజ్‌ నోటీసు జారీ చేసింది.
