చెన్నైలో మంగళవారం కురిసిన భారీ వర్షం కారణంగా రాకపోకలకు తీవ్ర అంతరాయం ఏర్పడింది. అనేక రహదారులు జలమయం అయ్యాయి. ఫలితంగా స్థానికులకు తీవ్ర ఇబ్బందులు ఎదురయ్యాయి.
7 నుంచి 11 సెంటీమీటర్ల వర్షపాతం నమోదయ్యే అవకాశం ఉందని వాతావరణ శాఖ ముందుగానే హెచ్చరించింది. తమిళనాడు, పుదుచ్చేరిలోని విల్లుపురం, చెంగల్పట్టు, చెన్నై, కాంచీపురం, కడలూరు, నాగపట్టణం, తిరువన్నామలై జిల్లాలో వర్షం సూచనలున్నట్లు తెలిపింది.
భారీ వర్షాల నేపథ్యంలో చెంబరంబాకం రిజర్వాయర్లోని మిగులు నీటిని విడుదల చేసేందుకు అధికారులు సిద్ధమవుతున్నారు. మొదటి విడతలో దాదాపు 500 క్యూసెక్కుల నీటిని విడుదల చేస్తామని ఓ అధికారి పేర్కొన్నారు. అడయార్ నది సమీప ప్రాంతాల్లో నివసించే ప్రజలను అప్రమత్తం చేశారు.
