హరియాణా శాసనసభ ఎన్నికల పోలింగ్ ముగిసింది. ఓటు హక్కు వినియోగించుకునేందుకు ఉదయం నుంచే ప్రజలు పోలింగ్ కేంద్రాలకు తరలివచ్చారు. సినీ, క్రీడా, రాజకీయ ప్రముఖులు ఓటు హక్కు వినియోగించుకున్నారు. సాయంత్రం 6 గంటల వరకు రాష్ట్రంలో 65 శాతం పోలింగ్ నమోదైంది.
90 స్థానాలకు ఒకే విడతలో ఎన్నికలు నిర్వహించారు. 1,169 మంది అభ్యర్థులు ఎన్నికల బరిలో నిలిచారు. ఉదయం 7 గంటలకు ప్రారంభమైన ఓటింగ్... సాయంత్రం 6 గంటలకు ముగిసింది.
ఖట్టర్ సైకిల్ యాత్ర...
హరియాణా ముఖ్యమంత్రి మనోహర్లాల్ ఖట్టర్... సైకిల్పై వచ్చి ఓటేశారు. చండీగఢ్ నుంచి జన్ శతాబ్ది ఎక్స్ప్రెస్ ద్వారా కర్నాల్ చేరుకున్న ఆయన అక్కడినుంచి పోలింగ్ కేంద్రానికి సైకిల్ యాత్ర చేశారు.
హరియాణా అసెంబ్లీ బరిలో నిలిచిన ముగ్గురు భాజపా అభ్యర్థులు, క్రీడా ప్రముఖులు సందీప్ సింగ్, యోగేశ్వర్ దత్, బబితా ఫొగాట్ తమ తమ నియోజకవర్గాల్లో ఓటు హక్కు వినియోగించుకున్నారు.
రాష్ట్ర మాజీ సీఎం, కాంగ్రెస్ సీనియర్ నేత భూపిందర్ సింగ్ హుడా... రోహ్తక్లోని ఓ పోలింగ్ బూత్లో ఓటేశారు. జేజేపీ నేత దుశ్యంత్ చౌతాలా... సిర్సా పోలింగ్ కేంద్రానికి ట్రాక్టర్పై కుటుంబంతో సహా చేరుకొని ఓటు హక్కు వినియోగించుకున్నారు. ఆదంపూర్లో భాజపా అభ్యర్థి, టిక్ టాక్ స్టార్ సోనాలీ ఫొగాట్ ఓటు వేశారు.
భారీ భద్రత...
కట్టుదిట్టమైన భద్రత నడుమ పోలింగ్ ప్రశాంతంగా జరిగింది. అక్టోబర్ 24న కౌంటింగ్ జరిపి.. ఫలితాలు ప్రకటించనున్నారు.
నువ్వా-నేనా...
90 శాసనసభ స్థానాలున్న హరియాణాలో భాజపా, కాంగ్రెస్తో పాటు ఐఎన్ఎల్డీ, జన్‌నాయక్ జనతా పార్టీ (జేజేపీ), హరియాణా జన్‌హిత్‌ కాంగ్రెస్ (హెచ్జేసీ), ఆమ్ ఆద్మీ పార్టీ, బహుజన్ సమాజ్ పార్టీ, స్వరాజ్ ఇండియా తదితర చిన్నపార్టీలు అభ్యర్థుల్ని బరిలోకి దింపాయి.
ప్రధాన పోటీ మాత్రం భాజపా, కాంగ్రెస్, జేజేపీ మధ్యనే. అధికారాన్ని తిరిగి నిలబెట్టుకోవాలని కాషాయ పార్టీ, ఎలాగైనా అధికారంలోకి రావాలని కాంగ్రెస్ ఈ ఎన్నికలను ప్రతిష్టాత్మకంగా తీసుకున్నాయి.
