ఉగ్రవాదాన్ని పూర్తిగా నిర్మూలించేందుకు పాకిస్థాన్ మనస్ఫూర్తిగా సహకరించాలని.. అప్పుడే ఇరు దేశాల మధ్య సత్సంబంధాలు మెరుగుపడతాయని భారత విదేశాంగ శాఖ మంత్రి జైశంకర్‌ అన్నారు. లీ మోండే అనే ఫ్రెంచ్‌ పత్రికకు ఇచ్చిన ఇంటర్వూలో జైశంకర్‌ ఈ వ్యాఖ్యలు చేశారు. భారత్‌, పాక్‌ దేశాల మధ్య ద్వైపాక్షిక సంబంధాలు పూర్తిగా కనుమరుగయ్యే దశలో ఉన్నాయని పాక్‌ విదేశాంగ శాఖ మంత్రి చేసిన వ్యాఖ్యలపై అడిగిన ప్రశ్నకు జైశంకర్‌ స్పందించారు.
‘పాకిస్థాన్ ఒక ఉగ్రవాద పరిశ్రమనే అభివృద్ధి చేసి పెంచి పోషిస్తోంది. దీని ద్వారా భారత్‌లోకి ఉగ్రవాదులను తరలిస్తూ దాడులకు పాల్పడుతోంది. దీనిని పాక్‌ కూడా ఖండించదు. ఇప్పుడు నాకు చెప్పండి?ఉగ్రవాదాన్ని పెంచి పోషిస్తున్న ఇలాంటి ఒక దేశంతో ఏ దేశమైనా చర్చలు జరిపేందుకు ముందుకు వస్తుందా?ఉగ్రవాదాన్ని నిర్మూలించేందుకు పాక్‌ సిద్ధంగా ఉందని మాటల్లో చెప్పడం కాకుండా చేతల్లో చూపించాలి. అప్పుడే ప్రపంచం నమ్ముతుంది’ అని జైశంకర్‌ పేర్కొన్నారు.
ఆర్టికల్‌ 370 రద్దు తర్వాత జమ్ము కశ్మీర్‌లో నెలకొన్న పరిస్థితులు, ఆంక్షలపై జైశంకర్‌ స్పందించారు. అక్కడ విధించిన ఆంక్షల్లో కొన్నింటిని ఇప్పటికే ఎత్తివేశామని.. పరిస్థితులకు అనుగుణంగా తొందర్లోనే పూర్తిగా ఆంక్షలను ఎత్తివేస్తామని చెప్పారు. ఇప్పటికే పరిస్థితులు సాధారణ స్థాయికి చేరుకున్నాయని అన్నారు. తొందర్లోనే విదేశీ జర్నలిస్టులను సైతం జమ్ముకశ్మీర్‌కు వెళ్లేందుకు అనుమతిస్తామని జైశంకర్‌ పేర్కొన్నారు.
ఇదీ చూడండి:మూడు కోడిగుడ్ల ధర 1672 రూపాయలా..?
