కరమ్‌వీర్ గురించి వినేవింటారు. ఎప్పుడైనా కలంవీర్‌ గురించి విన్నారా. ఇద్దరు కలంవీరుల గురించి ఈ కథనంలో తెలుసుకుందాం. వారి కళానైపుణ్యాలు చూస్తే మెచ్చుకోకుండా ఉండలేరు. దక్షిణ దిల్లీలోని ఘిటోర్‌నీ గ్రామంలోని రెండు వేర్వేరు కుటుంబాలకు చెందిన అమితాబ్, నిశా... స్కెచింగ్లో ఒకరిని మించిన ప్రతిభావంతులు మరొకరు. ఇద్దరి కుటుంబాల ఆర్థిక పరిస్థితి అంతంత మాత్రమే కావడంతో...అమితాబ్ ఓ దుకాణం నడుపుతూ కుటుంబాన్ని పోషిస్తుంటే, నిశా గడ్డు పరిస్థితుల్లో చదువు పూర్తిచేస్తోంది. స్కెచింగ్ వేయడం అమితాబ్‌కు చిన్నప్పటినుంచీ అలవాటే. ప్రత్యేక శిక్షణ ఏమీ తీసుకోలేదు. చాలా చిన్న వయసు నుంచే పెన్సిల్ చేతబట్టి బొమ్మలు గీసే నైపుణ్యాలు అతడి సొంతం. కానీ కుటుంబ ఆర్థిక పరిస్థితుల కారణంగా అమితాబ్ స్కెచింగ్‌పై పూర్తిస్థాయిలో దృష్టి పెట్టలేక పోతున్నాడు.
12వ తరగతి పూర్తయ్యాక, కళాశాలకు వెళ్లినప్పుడు...కొందరు చదువుకుంటుండగా, మరికొందరు ఇతర వ్యాపకాలతో గడపడం గమనించాను. వాళ్లందరికంటే భిన్నంగా ఏదైనా చేయాలని అనిపించింది. ఓచోట ఉచితంగానే స్కెచింగ్ కోర్సు నేర్పిస్తున్నారని ప్రీతి అనే నా స్నేహితురాలు చెప్పింది. నన్నూ వెళ్లి చేరమని సలహా ఇచ్చింది. అక్కడికి వెళ్లి, సర్‌ను కలిశాను. చిన్నతనంలో నేను వేసిన స్కెచ్‌లు చూపించాను. షాపు ద్వారా వచ్చే ఆదాయం ఇంటి ఖర్చులకు సరిపోతోంది. కొన్నిసార్లు ఫేస్‌బుక్, ఇన్‌స్టాగ్రాం లాంటి సామాజిక మాధ్యమాల ద్వారా నా స్కెచ్‌లకు కొంత డబ్బు వస్తోంది. స్కెచింగ్ ద్వారా అదనపు ఆదాయం వస్తుండడంతో నా సమయాన్ని వృథా చేయలేదని మా నాన్న కూడా ఇప్పుడు నన్ను నమ్ముతున్నారు.
---అమితాబ్, చిత్రకారుడు
కిరాణా దుకాణం నడుపుతూ కుటుంబ సభ్యుల పోషణ బాధ్యతలు చూసుకుంటున్నాడు అమితాబ్. ఇంటి నుంచి దుకాణం వరకూ కాలినడకనే వెళ్లడం ఈ యువకుడికి అలవాటు. ఎప్పుడు సమయం చిక్కినా... పెన్సిల్ చేతబట్టి, స్కెచింగ్ వేయడం ప్రారంభిస్తాడు.
ఒక్కసారైనా వారిని కలిసి..
తన ప్రతిభకు ప్రపంచవ్యాప్తంగా గుర్తింపు తెచ్చుకోవాలన్న లక్ష్యంతో స్కెచింగ్ నైపుణ్యాలకు పదును పెడుతున్నాడు అమితాబ్. స్కెచింగ్ కళను ఆసక్తి ఉన్న చిన్నారులకు ఉచింతగా నేర్పించాలనుకుంటున్నాడు. జీవితంలో ఒక్కసారైనా అమితాబ్ బచ్చన్‌, ప్రధాని నరేంద్రమోదీని కలిసి, వారికోసం వేసిన స్కెచింగ్‌లను బహుమతిగా ఇవ్వాలని కలలు గంటున్నాడు.
ఎలాంటి స్కెచ్‌నైనా అలవోకగా
ఇలాంటి మరో స్కెచింగ్ కళాకారిణి నిశా. సాధారణ రైతు కుటుంబంలో పుట్టి పెరిగిన ఈ యువతి... చిన్నప్పటినుంచే ఈ కళను ఒంటబట్టించుకుంది. చదువులో చురుగ్గా ఉంటూనే, అద్భుతమైన స్కెచ్‌లు వేసేది. ఆమె ప్రతిభను గుర్తించిన కుటుంబసభ్యులు...నిశాను మరింత ప్రోత్సహించారు. ఖాళీ సమయాన్నంతా స్కెచింగ్ కోసమే కేటాయిస్తోంది నిశా. ప్రముఖుల చిత్రాలు సహా ఏ స్కెచ్‌నైనా అలవోకగా గీసేస్తోంది.
12వ తరగతి అయిపోయిన తర్వాత స్కెచింగ్‌పై దృష్టిపెట్టాను. దానితో పాటు..పెయింటింగి, క్విల్లింగ్‌ ఆర్ట్‌లోనూ నాకు ప్రవేశముంది. నేర్చుకున్న కళకు సంబంధించిన పనులు కొన్ని చేస్తున్నాను. మా కుటుంబసభ్యులంతా నన్ను ప్రోత్సహిస్తారు. మా అమ్మ, నాన్న, నానమ్మ, చెల్లి...అందరూ నిరంతరం మద్దతుగా ఉన్నవాళ్లే. లాక్‌డౌన్ సమయంలో నా వద్ద డ్రాయింగ్ షీట్లు కూడా లేవు. కాబట్టి, పాత పేపరునే రీసైకిల్ చేసి వాడాలన్న ఆలోచన వచ్చింది. వాడేసిన పాత షీట్లపైనే స్కెచింగ్ వేయడం ప్రారంభించా. నాకంటూ ఓ సొంతిల్లుండాలనేది నా కోరిక. ఆడపిల్లలకు పుట్టిల్లు, మెట్టినిల్లు ఉంటాయి. తన పేరు మీద ఓ ఇల్లంటూ ఉండదు. డ్రాయింగ్ టీచర్ కావాలన్నది నా కల. చిన్నారులకు ఉచితంగా నేర్పించాలనుకుంటున్నాను. ఎందుకంటే అలా నేర్చుకోవడానికి నాకే గురువులూ దొరకలేదు.
--నిశా, చిత్రకారిణి
చిత్తు కాగితంపైనే అందమైన స్కెచింగ్ వేయడం నిశా ప్రత్యేకత. వాడిపారేసిన పేపర్‌పైనా, న్యూస్‌పేపర్లపైనా అందమైన చిత్రాలు గీస్తోంది. నిశా ఆశయం కూడా అమితాబ్ కంటున్న కల లాంటిదే. ఇద్దరూ తమ ప్రతిభకు విస్తృత స్థాయి గుర్తింపు రావాలని కోరుకుంటున్నారు. తమ ఊరికి మంచి పేరు తేవాలని కలలు గంటున్నారు. తనపేరు మీద ఓ ఇంటిని నిర్మించుకోవాలని నిశా లక్ష్యంగా పెట్టుకుంది.
కోడిగుడ్లపై ఎటువంటి చిత్రాన్నైనా అవలీలగా గీసేయగలడు అమితాబ్. చిత్తుకాగితాలను అందమైన కళాఖండంగా మార్చేయగలదు నిశా. పెద్ద వేదికలపై తమ ప్రతిభను చాటేందుకు ఒక్క అవకాశం కోసం ఎదురుచూస్తున్నారు ఈ ఇద్దరు యువ కళాకారులు.
