అయోధ్యలో రామ మందిర నిర్మాణానికి సంబంధించిన భూమిపూజ కార్యక్రమానికి సోమవారం శ్రీకారం చుట్టారు. 11 మంది పూజారుల శాస్త్రోక్త మంత్ర పఠనం మధ్య ఉదయం 8 గంటలకు వైదిక సంప్రదాయం ప్రకారం.. గౌరీ గణేశ పూజతో ఈ కార్యక్రమం మొదలైంది. భూమిపూజను పురస్కరించుకుని హనుమాన్‌ దేవాలయంలో ప్రత్యేక హారతి కార్యక్రమాన్ని నిర్వహించారు.
చారిత్రక ఘట్టానికి అయోధ్య సర్వాంగ సుందరంగా ముస్తాబైంది. దేశవ్యాప్తంగా ఉన్న వివిధ రామాలయాల్లో కూడా రామాయణ పారాయణం కొనసాగింది. మూడు రోజుల పాటు నిర్వహించనున్న భూమిపూజ కార్యక్రమానికి ప్రధాన మంత్రి నరేంద్ర మోదీ బుధవారం హాజరు కానున్నారు. ఈ కార్యక్రమం ముగిసిన అనంతరం మందిర నిర్మాణం మొదలవుతుందని స్థానిక పూజారులు వివరించారు.
కట్టుదిట్టమైన భద్రత
భూమిపూజను పురస్కరించుకుని ఉత్తర్‌ ప్రదేశ్‌ పోలీసులు పట్టణంలో కట్టుదిట్టమైన భద్రతా ఏర్పాట్లు చేశారు. రైల్వే స్టేషన్‌, బస్‌ స్టాండ్‌ సహా భూమిపూజ జరిగే ప్రాంతాల్లో అణువణువూ తనిఖీ చేస్తున్నారు. ప్రధాని మోదీతో సహా పలువురు ముఖ్యమంత్రులు, ప్రముఖులు హాజరు కానున్న నేపథ్యంలో పటిష్ఠ చర్యలను చేపడుతున్నారు.
యోగి పరిశీలన
అయోధ్యలో రామమందిర శంకుస్థాపన కార్యక్రమ ఏర్పాట్లను యూపీ సీఎం యోగి ఆదిత్యనాథ్ పరిశీలించారు. కరోనా వ్యాప్తి నేపథ్యంలో తీసుకోవాల్సిన జాగ్రత్తలపై అధికారులకు సూచనలు చేశారు.
కరోనా ప్రోటోకాల్
ప్రధాన పూజారి సహాయకుడితో పాటు పలువురు పోలీసు సిబ్బందికి కరోనా సోకిన నేపథ్యంలో కొవిడ్‌-19 ప్రొటోకాల్‌ను కూడా కచ్చితంగా అమలు చేస్తున్నామని డీఐజీ దీపక్‌ కుమార్‌ వెల్లడించారు. పట్టణంలో ఐదుగురి కంటే ఎక్కువ మంది ఒకే చోట గుమిగూడకుండా ఆంక్షలు విధించినట్టు వివరించారు. కరోనా పరీక్షల్లో నెగిటివ్‌ వచ్చి, 45 సంవత్సరాల కంటే తక్కువ వయసున్న వారిని మాత్రమే ప్రధాని భద్రతా విధుల్లో వినియోగిస్తామని అధికారులు తెలిపారు.
