కొవిడ్-19తో దేశవ్యాప్తంగా పాఠశాలలు మూసివేసినందువల్ల విద్యార్థులు ఆన్లైన్ క్లాసులకే పరిమితమయ్యారు. అయితే కేరళ ఇడుక్కి జిల్లా రాజమాలాకు చెందిన విద్యార్థులు సిగ్నల్ కోసం రోజూ ఆరు కిలోమీటర్లు నడుస్తున్నారు. ఎండా, వానల్ని సైతం లెక్కచేయకుండా రోడ్డునే పాఠశాలగా భావించి ఆన్లైన్ తరగతులు వింటున్నారు. వీళ్లంతా స్థానిక కాఫీ తోటల్లో పనిచేసేవారి పిల్లలు.
" సిగ్నల్ కోసం రోజూ 12 కిలోమీటర్లు నడక ప్రయాణం చేయటం కష్టంగా ఉంది. దారిలో ఎక్కడా విశ్రాంతి సదుపాయం లేదు. మూత్రశాలలు లేవు. మాకు ఇంటర్నెట్ సదుపాయం లేదంటే ఉపాధ్యాయులు నమ్మటం లేదు. దీంతో మేము సిగ్నల్ ఉన్న చోటుకు వెళ్లి ఆన్లైన్ క్లాసులు వింటున్నాం. సాయంత్రం ఐదు గంటలవరుకూ రోడ్డు పక్కనే కూర్చొని పాఠాలు నేర్చుకుంటున్నాం. ఇంటికి వెళ్లేసరికి రాత్రి అవుతుంది."
--ఓ విద్యార్థిని ఆవేదన
8 నెలలుగా తప్పని పాట్లు
తెల్లవారుజామునే పుస్తకాలు, మొబైల్ఫోన్స్, లంచ్బాక్స్లు సిద్ధం చేసుకుని నడక ప్రారంభిస్తారు. సిగ్నల్ కోసం 6 కిలోమీటర్లు నడిచి ఓ రోడ్డు పక్కన కూర్చొని ఆన్లైన్ క్లాసులు వింటున్నారు. 8నెలలుగా విద్యార్థులు ఇలానే పాఠాలను నేర్చుకుంటున్నారు. ఈ ప్రాంతంలో ఇంటర్నెట్ సదుపాయం లేక చాలా మంది విద్యార్థులు చదువు మానేశారు.
ఇదీ చదవండి : ప్రశాంతంగా కేరళ 'స్థానిక' పోరు- ప్రముఖుల ఓట్లు
