ఉత్తర్ప్రదేశ్లోని అయోధ్యలో ప్రతిష్టాత్మకంగా నిర్మించే మసీదు నమూనాను ఈ శనివారం(డిసెంబర్ 19న) విడుదల చేయనున్నట్లు ఇండో-ఇస్లామిక్ కల్చరల్ ఫౌండేషన్ (ఐఐసీఎఫ్) ట్రస్టు ప్రకటించింది. మసీదు నిర్మాణానికి ధన్నీపుర్లో కేటాయించిన 5 ఎకరాల స్థలంలో.. రాజ్యాంగం అమల్లోకి వచ్చిన గణతంత్ర దినోత్సవం రోజున శంకుస్థాపన కార్యక్రమం నిర్వహించనున్నట్లు తెలిపింది.
మసీదు నిర్మాణం కోసం.. గతంలో 15 మంది సభ్యులతో ఐఐసీఎఫ్ ట్రస్ట్ను ఏర్పాటు చేసింది సున్నీ వక్ఫ్ బోర్డు. మసీదు ప్రాంగణంలో మల్టీ స్పెషాలిటీ ఆసుపత్రి, ప్రజా గ్రంథాలయం, ఇండో-ఇస్లామిక్ వారసత్వ సంపద కేంద్రాన్ని నిర్మించనున్నట్లు వెల్లడించింది.
ఒకేసారి 2 వేల మంది నమాజ్..
జామియా మిల్లియా విశ్వవిద్యాలయం ఆర్కిటెక్చర్ విభాగాధిపతి ఎస్ఎం అక్తర్.. ఈ మసీదు రూపకర్తగా ఉన్నారు. ఆయన నమూనాను ఖరారు చేశారు. ఒకేసారి 2 వేల మంది నమాజ్ చేసుకునేలా మసీదును రూపొందించనున్నట్లు అక్తర్ తెలిపారు. నిర్మాణం వలయాకారంలో ఉంటుందని ఆయన వెల్లడించారు. అయితే.. ఇది బాబ్రీ మసీదు కంటే పెద్దగా ఉంటుందని స్పష్టం చేశారు.
ఇదీ చూడండి: అయోధ్య మసీదు రూపశిల్పిగా ప్రొఫెసర్ అక్తర్
అయోధ్యలో రామజన్మభూమి-బాబ్రీ మసీదు భూమికి సంబంధించి దశాబ్దాల వివాదానికి గతేడాది నవంబర్ 9న తెరదించింది సుప్రీంకోర్టు. మసీదు నిర్మాణానికి ముస్లింలకు ప్రత్యామ్నాయ స్థలాన్ని కేటాయించాలని ఆదేశించిన న్యాయస్థానం.. వివాదాస్పద స్థలంలో రామమందిర నిర్మాణానికి ట్రస్ట్ను ఏర్పాటు చేయాలని అప్పట్లో కేంద్రాన్ని ఆదేశించింది.
ఈ మేరకు 2.77 ఎకరాల స్థలంలో రామమందిర నిర్మాణం ఇప్పటికే ప్రారంభమైంది. మసీదు కోసం.. ధన్నీపుర్లోని 5 ఎకరాల భూమిని సున్నీ వక్ఫ్ బోర్డుకు అందించింది యోగి ప్రభుత్వం.
ఇదీ చూడండి: బాబ్రీ మసీదు కేసు.. పూర్తి కథనాలు
