దేశంలో మొదటి లోక్పాల్గా సుప్రీంకోర్టు మాజీ న్యాయమూర్తి జస్టిస్ పినాకి చంద్రఘోష్ నియమితులయ్యే అవకాశం ఉంది. ఆయన పేరు పరిశీలనలో ఉన్నట్టు అధికార వర్గాలు తెలిపాయి. చంద్రఘోష్తో చర్చించిన తర్వాతే తుది నిర్ణయం వెలువడే అవకాశం ఉందని వెల్లడించాయి.
సుప్రీంకోర్టు న్యాయమూర్తిగా ఉన్న జస్టిస్ ఘోష్ 2017 మేలో పదవీ విరమణ పొందారు. జాతీయ మానవ హక్కుల కమిషన్(ఎన్హెచ్ఆర్సీ) సభ్యుడిగా ప్రస్తుతం ఆయన బాధ్యతలు నిర్వహిస్తున్నారు.
ప్రధాని నరేంద్ర మోదీ నేతృత్వంలో జరిగిన లోక్పాల్ ఎంపిక కమిటీ సమావేశంలో ఘోష్ పేరు ప్రతిపాదనకు వచ్చినట్టు సమాచారం. అయితే ఈ విషయంపై ప్రభుత్వం ఇప్పటి వరకూ ఎలాంటి అధికారిక ప్రకటన చేయలేదు. శుక్రవారం జరిగిన ప్యానెల్ సమావేశాన్ని లోక్ పాల్ ఎంపిక కమిటీలో సభ్యుడైన కాంగ్రెస్ నేత మల్లికార్జున ఖర్గే బహిష్కరించారు. ఘోష్ నియామకాన్ని ప్రభుత్వం అధికారికంగా ప్రకటిస్తే ఈ అంశం వివాదంగా మారే అవకాశాలు లేకపోలేదు.
స్వాగతించిన అన్నా హజారే
పినాకి చంద్ర ఘోష్ను మొదటి లోక్పాల్గా నియమించనున్నారన్న వార్తలను సామాజిక ఉద్యమకారుడు అన్నా హజారే స్వాగతించారు.
"దేశానికి మొదటి లోక్పాల్ను నియమిస్తూ తీసుకున్న నిర్ణయాన్ని నేను స్వాగతిస్తున్నా. 48 ఏళ్లుగా దీనిపై ప్రజా ఉద్యమం జరుగుతోంది. చివరికి ఇప్పుడు విజయం సాధించాం" -అన్నా హజారే.
లోక్ పాల్ను నియమించాలని అన్నాహజారే చాలా సార్లు నిరాహార దీక్షలు చేపట్టారు. ఈ ఏడాది ఫిబ్రవరి-మార్చి నెలల్లో కూడా ఆయన స్వస్థలం ఆహ్మద్నగర్లో నిరాహార దీక్ష చేశారు.
