కర్ణాటక రాజకీయాలు అనూహ్య మలుపులతో రసవత్తరంగా సాగుతున్నాయి. తాజాగా ఐదుగురు అసమ్మతి ఎమ్మెల్యేలు సుప్రీంకోర్టును ఆశ్రయించారు. స్పీకర్ వెంటనే తమ రాజీనామాలు ఆమోదించేలా ఆదేశాలు జారీ చేయాలని కోరారు. సర్వోన్నత న్యాయస్థానాన్ని ఆశ్రయించిన వారిలో ఆనంద్ సింగ్, రోషన్ బేగ్ ఉన్నారు.
ఇప్పటికే 10 మంది రెబల్స్ సుప్రీంకోర్టులో ఇలాంటి వ్యాజ్యమే దాఖలు చేశారు. శుక్రవారం విచారణ చేపట్టిన న్యాయస్థానం... కీలక ఆదేశాలు జారీచేసింది. రాజీనామాలు సహా అనర్హత వేటు వేయాలన్న అభ్యర్థనలపై మంగళవారం వరకు ఎలాంటి నిర్ణయం తీసుకోరాదని స్పీకర్కు సూచించింది.
అసమ్మతి ఎమ్మెల్యేలను బుజ్జగించేందుకు కాంగ్రెస్, జేడీఎస్ విశ్వప్రయత్నాలు చేస్తున్న వేళ... ఐదుగురు ఎమ్మెల్యేలు సుప్రీంకోర్టును ఆశ్రయించడం ప్రాధాన్యం సంతరించుకుంది. రాజీనామా ఉపసంహరణకు మంత్రి నాగ్రాజ్ సుముఖుత వ్యక్తంచేసినా... మిగిలిన రెబల్స్ తిరిగి కూటమిలోకి రావడంపై అనుమానాలు పెరిగేందుకు కారణమైంది.
భాజపాకే మా మద్దతు
సంకీర్ణ ప్రభుత్వానికి మద్దతు ఉపసంహరించుకున్న స్వతంత్ర సభ్యులు కూడా ఏ మాత్రం వెనక్కి తగ్గే అవకాశం కనిపించడంలేదు. శాసనసభలో విపక్ష స్థానాల వద్ద తమకు సీట్లు కేటాయించాలని ఎమ్మెల్యేలు ఆర్ శంకర్, హెచ్ నగేశ్ తాజాగా స్పీకర్కు లేఖ రాశారు.
కుమారస్వామి ప్రభుత్వాన్ని వీడి, భాజపాకు మద్దతు ఇస్తున్నట్లు స్పీకర్కు ఈనెల 8న శంకర్, నగేశ్ లేఖ రాశారు.
ఇదీ చూడండి: 'ఊరూరా ఉద్యమస్థాయిలో స్వచ్ఛ భారత్'
