జమ్ముకశ్మీర్ మాజీ ముఖ్యమంత్రి ఫరూక్ అబ్దుల్లాను ప్రభుత్వం అరెస్టు చేయలేదని లోక్సభలో కేంద్ర హోంమంత్రి అమిత్షా వెల్లడించారు. నేషనల్ కాన్ఫరెన్స్ నేత ఇష్టపూర్వకంగానే తన నివాసంలో ఉన్నారని షా వివరించారు.
లోక్సభలో నేషనలిస్ట్ కాంగ్రెస్ పార్టీ నేత సుప్రియా సులే చేసిన వ్యాఖ్యలకు సమాధానంగా షా ఈ విధంగా స్పందించారు. తన పక్కన ఫరూక్ అబ్దుల్లా కూర్చునే వారని, ప్రస్తుతం సభలో ఆయన లేరని సుప్రియ వ్యాఖ్యానించారు.
ప్రస్తుతం లోక్సభలో ఆర్టికల్ 370పై వాడీ-వేడీ చర్చ జరుగుతోంది. ఇలాంటి సమయంలో ఫరూక్ లేకపోతే.. అసలు చర్చే అసంపూర్ణంగా మిగిలిపోతుందని సుప్రియా సులే అభిప్రాయపడ్డారు.
'నేతలను వెంటనే విడిచిపెట్టాలి'
ఆర్టికల్ 370 రద్దును తీవ్రంగా వ్యతిరేకించిన కాంగ్రెస్ నేత రాహుల్ గాంధీ.. జమ్ముకశ్మీర్లో కీలక నేతలను ప్రభుత్వం రహస్య ప్రదేశాల్లో బంధించిందని ఆరోపించారు. ఇది ప్రజాస్వామ్యానికి, రాజ్యాంగానికి విరుద్ధమని విమర్శించారు. అరెస్టయిన నేతలను వెంటనే విడుదల చేయాలని డిమాండ్ చేశారు.
ఇదీ చూడండి:- 'ఉగ్ర కుట్రల జోరు పెంచిన పాకిస్థాన్'
