మహారాష్ట్రలో దేవేంద్ర ఫడణవీస్ రెండోసారి ముఖ్యమంత్రిగా బాధ్యతలు చేపట్టటంపై కీలక వ్యాఖ్యలు చేశారు భాజపా ఎంపీ అనంత కుమార్ హెగ్డే. ప్రభుత్వానికి కావాల్సిన మెజారిటీ లేదని తెలిసినా.. ముఖ్యమంత్రిగా బాధ్యతలు చేపట్టటం వెనుక ఓ పెద్ద కథ ఉందని చెప్పారు. కేంద్ర ప్రభుత్వం రాష్ట్రానికి కేటాయించిన రూ.40వేల కోట్లను కాపాడేందుకు డ్రామా చేపట్టినట్లు స్పష్టం చేశారు. అందుకోసమే ఎవరికీ తెలియకుండా.. కోడి కూయకముందే ముఖ్యమంత్రిగా ఫడణవీస్ ప్రమాణం చేసినట్లు తెలిపారు అనంత కుమార్.
కర్ణాటక ఉప ఎన్నికల ప్రచారంలో భాగంగా బెంగళూరులో ఓ కార్యక్రమంలో పాల్గొన్న సందర్భంగా ఈ వ్యాఖ్యలు చేశారు అనంత కుమార్.
" మీ అందరికీ తెలుసు మా పార్టీ నేత ఫడణవీస్ మహారాష్ట్రలో కేవలం 80 గంటలే ముఖ్యమంత్రిగా ఉన్నారు. ఆ తర్వాత ఆయన రాజీనామా చేశారు. ఈ డ్రామా మేము ఎందుకు చేశామని అనుకుంటున్నారా? మాకు మెజారిటీ లేదని తెలిసి, ఆయన ఎందుకు సీఎం అయ్యారు? అని ప్రతి ఒక్కరు అడికే సాధారణ ప్రశ్న ఇది.
రూ.40వేల కోట్లకుపైగా నిధులు ముఖ్యమంత్రి అధీనంలో ఉన్నాయి. ఒకవేళ ఎన్సీపీ, కాంగ్రెస్, శివసేన కూటమి అధికారంలోకి వస్తే ఆ నగదును అభివృద్ధి కోసం ఖర్చు చేయదు. ఇతర వాటి కోసం వినియోగిస్తుంది. అందుకే ముఖ్యమంత్రిగా పదవి చేపట్టాలని ముందుగానే ప్రణాళిక చేశాం. కూటమి ప్రభుత్వం ఏర్పాటు చేస్తుందని తెలిసినప్పుడే ఈ డ్రామా అమలు చేయాలని నిర్ణయం తీసుకున్నాం. అన్ని విధాలా సర్దుబాట్లు జరిగాయి. ఫడణవీస్ సీఎంగా ప్రమాణం చేశారు. ప్రమాణం చేసిన 15 గంటల్లోనే ఆ రూ. 40వేల కోట్లు ఎక్కడికి చేరాలో అక్కడికి చేర్చారు. "
- అనంత కుమార్ హెగ్దే, భాజపా ఎంపీ.
