దిల్లీ ఘర్షణలతో సంబంధం ఉందన్న ఆరోపణలతో జవహార్లాల్ నెహ్రూ విశ్వవిద్యాలయ మాజీ విద్యార్థి నేత ఉమర్ ఖలీద్ను పోలీసులు అదుపులోకి తీసుకున్నారు. ఖలీద్ను 11 గంటలపాటు విచారించిన తర్వాత దిల్లీ పోలీసు ప్రత్యేక విభాగం ఆదివారం రాత్రి అరెస్టు చేసినట్లు అధికారులు తెలిపారు. ఖలీద్ను ఇవాళ న్యాయస్థానంలో హాజరుపర్చనున్నట్లు వెల్లడించారు.
అల్లర్లతో సంబంధం ఉందన్న అనుమానాలతో ఖలీద్ను సెప్టెంబర్ 2న దిల్లీ పోలీసు క్రైం బ్రాంచ్ రెండు గంటల పాటు విచారించింది. ఘర్షణలకు సంబంధించి ఓ కేసులో ఖలీద్పై చట్టవ్యతిరేక కార్యకలాపాల చట్టం ప్రకారం ఇదివరకే కేసు నమోదైంది. ఘర్షణలో కుట్రకోణంపై దిల్లీ పోలీసు ప్రత్యేక సెల్ ఖలీద్ను ప్రశ్నించింది. అతని సెల్ఫోన్ను స్వాధీనం చేసుకుంది.
హింస
ఈశాన్య దిల్లీలో ఫిబ్రవరి 24న హింసాత్మక ఘర్షణ చెలరేగింది. సీఏఏ అనుకూల, వ్యతిరేక వర్గాల మధ్య జరిగిన ఈ ఘర్షణలో 53 మంది మరణించారు. మరో 200 మందికిపైగా గాయపడ్డారు. హింసాత్మక నిరసనలను అడ్డుకునే క్రమంలో ఇద్దరు పోలీసులు ప్రాణాలు కోల్పోగా.. 108 మంది గాయపడ్డారు.
