నవ్​జోత్​ సింగ్​ సిద్ధూకు ఈసీ నోటీసులు

కాంగ్రెస్​ నేత నవ్​జోత్​ సింగ్​ సిద్ధూకు ఎన్నికల సంఘం షోకాజ్​ నోటీసులు జారీ చేసింది. ఇటీవల బిహార్​ ఎన్నికల ప్రచారంలో మతపరమైన వ్యాఖ్యలు చేశారన్న ఆరోపణలతో ఈసీ చర్యలు చేపట్టింది.

కాంగ్రెస్​ నాయకుడు, పంజాబ్​ మంత్రి నవ్​జోత్​ సింగ్​ సిద్ధూపై ఎన్నికల సంఘం చర్యలు చేపట్టింది. బిహార్​ కటిహార్​ ఎన్నికల ప్రచారంలో భాగంగా మతపరమైన వ్యాఖ్యలు చేశారని ఈసీ దృష్టికి వచ్చింది. నేతల ప్రచారాలపై ఇటీవల కఠినంగా వ్యవహరిస్తోన్న ఎన్నికల సంఘం సిద్ధూకి షోకాజ్​ నోటీసులు జారీ చేసింది.

లోక్​సభ ఎన్నికల నేపథ్యంలో సిద్ధూ ఎన్నికల ప్రవర్తనా నియమావళిని ఉల్లంఘించారని ఈసీ పేర్కొంది. అలాగే రాజకీయ ప్రచారాల్లో మతపరమైన వ్యాఖ్యలపై నిషేధం విధించిన సుప్రీం కోర్టు ఆదేశాలను సైతం ఉల్లంఘించారని తెలిపింది.

తాము జారీ చేసిన నోటీసుపై 24 గంటల్లోపు నవ్​జోత్​ సిద్ధూ వివరణ ఇవ్వాలని కోరింది. బిహార్​ కటిహార్​ జిల్లాలో నిర్వహించిన ఎన్నికల ర్యాలీలో ఆయనపై ఇటీవలే కేసు నమోదైంది.

ఇదీ చూడండీ: మోదీ వెబ్​ సిరీస్​పైనా ఈసీ నిషేధం