ఎన్నికల వేళ కొత్త పార్టీల కోలాహలం

భారత్​లో మొత్తం 2వేల293 రాజకీయ పార్టీలు ఉన్నట్టు ఎన్నికల సంఘం ప్రకటించింది. గత 40 రోజుల్లోనే 149 పార్టీలు ఆవిర్భవించాయని వెల్లడించింది.

కాంగ్రెస్, భాజపా, తెదేపా, తెరాస​, డీఎంకే, తృణమూల్​ కాంగ్రెస్​​... ఇలా జాతీయం నుంచి ప్రాంతీయం వరకు దేశంలో ఎన్నో రాజకీయ పార్టీలు ఉన్నాయి. 'మన దేశంలో మొత్తం ఎన్ని పార్టీలు ఉన్నాయి?' ఈ ప్రశ్న మీకు ఎప్పుడోసారి వచ్చే ఉంటుంది? మీ సందేహానికి ఎన్నికల సంఘం తాజాగా విడుదల చేసిన గణాంకాలే సమాధానం.

దేశంలో మొత్తం రాజకీయ పార్టీల సంఖ్య 2వేల 293. ఈ విషయాన్ని వెల్లడించింది కేంద్ర ఎన్నికల సంఘం. ఈ నెల 9వ తేదీలోపు నమోదైన వివరాలను ప్రకటించింది.

లోక్​సభ ఎన్నికలు సమీపిస్తున్న నేపథ్యంలో ఈ ఏడాది ఫిబ్రవరి నుంచి ఇప్పటి దాకా 149 పార్టీలు కొత్తగా పేర్లను ఎన్నికల సంఘంలో నమోదు చేసుకున్నాయి. ఫిబ్రవరి ముందు వరకు పార్టీల సంఖ్య 2వేల143. గతేడాది జరిగిన ఐదు రాష్ట్రాల ఎన్నికలకు ముందు 58 కొత్త పార్టీలు నమోదు చేసుకున్నాయి.

నమోదైనప్పటికీ గుర్తింపు పొందని పార్టీలకు సొంత ఎన్నికల గుర్తు ఉండదని ఈసీ స్పష్టం చేసింది. ఈసీ వద్ద ఉన్న 84 ఉచిత గుర్తులనే వినియోగించి ఎన్నికల బరిలో దిగాలని తెలిపింది.

గుర్తింపు పొందడం ఎలా?

రాష్ట్రం లేదా జాతీయ స్థాయిలో ఒక పార్టీ గుర్తింపు పొందాలంటే అసెంబ్లీ లేదా లోక్​సభకు అంతకుముందు జరిగిన ఎన్నికల్లో కనీస సీట్ల శాతం పొంది ఉండాలి.