కరుడుగట్టిన నేరస్థుడు, కాన్పుర్ ఎన్కౌంటర్ ఘటనలో ప్రధాన నిందితుడు వికాస్ దూబే ఎట్టకేలకు పోలీసులకు చిక్కాడు. గురువారం ఉదయం మధ్యప్రదేశ్ ఉజ్జయిన్లో మహాకాల్ ఆలయం వద్ద అతన్ని అరెస్టు చేశారు. తొలుత భద్రతా సిబ్బంది ఒకరు చూసి స్థానిక పోలీసులకు సమాచారం అందించగా అదుపులోకి తీసుకున్నారు. పోలీసులు దూబేను ఈడ్చుకెళ్తున్న సమయంలో.. 'నేను వికాస్ దూబే.. కాన్పుర్ వాసిని' అని గట్టిగా అరిచాడు. దూబేతో పాటు మరో ఇద్దరు అనుచరులను కూడా అరెస్టు చేశారు పోలీసులు.
దూబే అరెస్టును మధ్యప్రదేశ్ హోంమంత్రి నరోత్తమ్ మిశ్రా ధ్రువీకరించారు. అనంతరం ఈ సమాచారాన్ని యూపీ సీఎం యోగి ఆదిత్యనాథ్కు చేరవేశారు ఎంపీ ముఖ్యమంత్రి శివరాజ్సింగ్ చౌహాన్. ప్రస్తుతం దూబేను మధ్యప్రదేశ్ పోలీసులు విచారిస్తున్నారు. అనంతరం.. ట్రాన్సిట్ రిమాండ్పై యూపీకి తరలించనున్నారు.
8 మంది పోలీసులను చంపి...
జులై 3న జరిగిన కాన్పుర్ ఎన్కౌంటర్ ఘటన దేశవ్యాప్తంగా సంచలనం సృష్టించింది. రౌడీషీటర్ వికాస్ దూబేను పట్టుకునేందుకు చేపట్టిన ఆపరేషన్లో... అతడి అనుచరులు పోలీసులపై విచక్షణారహితంగా కాల్పులు జరిపారు. ఈ ఘటనలో ఎనిమిది మంది పోలీసులు అమరులయ్యారు. మరికొందరు గాయపడ్డారు. అప్పటినుంచి పరారీలో ఉన్నాడు వికాస్ దూబే.
ఇదీ చూడండి: రౌడీషీటర్ల దాడిలో 8 మంది పోలీసులు మృతి
బిక్రూ గ్రామానికి చెందిన వికాస్పై 60కిపైగా క్రిమినల్ కేసులున్నాయి. ఎన్నో దొంగతనాలు, అపహరణలు, హత్య కేసుల్లో ప్రధాన నిందితుడు అతడు. 2001లో భాజపా నేత సంతోష్ శుక్లా హత్య కేసులోనూ ఇతని ప్రమేయమున్నట్లు ఆరోపణలున్నాయి. కాన్పుర్ ఎన్కౌంటర్ అనంతరం దూబే తలపై రూ. 5 లక్షల రివార్డు ప్రకటించింది యోగి ప్రభుత్వం.
ఈ కేసును ప్రతిష్టాత్మకంగా తీసుకున్న స్థానిక యంత్రాంగం అప్రమత్తమైంది. భారీగా పోలీసు బృందాలను ఏర్పాటుచేసి.. గాలింపు చర్యలు ముమ్మరం చేసింది.
ఇదీ చూడండి: దూబే డెన్పై దాడి సమాచారం పోలీసుల నుంచే లీక్
కాన్పుర్ ఘటన జరిగిన దగ్గరనుంచి ఇప్పటివరకు దూబే బృందంలోని ఐదుగురు దుండగులు పోలీసుల చేతిలో హతమయ్యారు. మరికొందరిని అరెస్టు చేశారు. వికాస్కు ముందే సమాచారం అందించారన్న ఆరోపణలతో ఇద్దరు పోలీసులను కూడా సస్పెండ్ చేశారు.
దూబే అనుచరుల్లో కీలకంగా ఉన్న అమర్ దూబేను ఉత్తర్ప్రదేశ్లోని హమిర్పుర్లో బుధవారం ఎన్కౌంటర్ చేశారు. ప్రేమ్ ప్రకాశ్ పాండే, అతుల్ దూబేలను కాన్పుర్ ఘటన జరిగిన గంటల వ్యవధిలోనే హతమార్చారు. దూబే అరెస్టుకు ముందు.. మరో ఇద్దరు అనుచరులు బహువా దూబే, ప్రభాత్ మిశ్రానూ ఎన్కౌంటర్ చేశారు.
కాన్పుర్లోనే 2 రోజులు..
అయితే.. జులై 3న అర్ధరాత్రి కాన్పుర్ ఘటన జరిగిన తర్వాత 2 రోజులు అక్కడే శివ్లీ అనే ఊర్లో తలదాచుకున్నట్లు అధికారిక వర్గాలు తెలిపాయి. దూబే అనుచరుల్లో అరెస్టైన ఓ వ్యక్తి.. ఈ విషయాలు వెల్లడించాడు.
వివరాల ప్రకారం.. ఘటన జరిగిన తర్వాత తన ఇద్దరు అనుచరులతో సైకిళ్లపై శివ్లీకి చేరుకొని.. అక్కడే తన స్నేహితుడి ఇంట్లో ఉన్నాడు వికాస్. 2 రోజులకు.. ఇద్దరూ బైక్పై లఖ్నవూ వెళ్లగా, దూబే మరో వ్యక్తి అమర్తో కలిసి ట్రక్కులో హరియాణాలోని ఫరీదాబాద్ వెళ్లాడు.
అనంతరం.. అంబాహ్, మురేనా మీదుగా మధ్యప్రదేశ్లోని ఉజ్జయిన్కు చేరుకున్నాడని తెలుస్తోంది. ఇది పోలీసుల పనితీరుపై సందేహాలు లేవనెత్తుతోంది. పటిష్ఠ భద్రత ఉన్నప్పటికీ.. నిందితుడు 2 రాష్ట్రాలు ఎలా దాటాడని విమర్శలు వెల్లువెత్తుతున్నాయి. ఆ కోణంలోనూ అధికారులు దర్యాప్తు చేయనున్నారు.
సీబీఐ దర్యాప్తునకు డిమాండ్...
కాంగ్రెస్ నేత ప్రియాంక గాంధీ.. యోగి ప్రభుత్వంపై విమర్శలు గుప్పించారు. ఇది పూర్తి పోలీసుల వైఫల్యమని ఆరోపించారు. వికాస్ కేసును సీబీఐకి అప్పగించాలని డిమాండ్ చేశారు. ఈ వ్యవహారం వెనుక చాలా విషయాలు దాగున్నాయని.. సీబీఐ దర్యాప్తుతోనే వాస్తవాలు వెలుగులోకి వస్తాయని వ్యాఖ్యానించారు.
ఇదీ చూడండి: 'గ్యాంగ్స్టర్ వికాస్ కేసును సీబీఐకి అప్పగించాలి'
వికాస్ను అరెస్టు చేశారా.. లేక తనంతట తానే లొంగిపోయాడో స్పష్టతనివ్వాలని.. సమాజ్వాదీ పార్టీ అధ్యక్షుడు అఖిలేశ్ యాదవ్ డిమాండ్ చేశారు. కాల్ డేటా పరిశీలించాలని, అప్పుడే పూర్తి విషయాలు తెలుస్తాయని అభిప్రాయపడ్డారు.
ఆ దేవుడే కాపాడాడు: దూబే తల్లి
ఉజ్జయిన్ మహాకాల్ ఆలయాన్ని.. వికాస్ దూబే ఏటా సందర్శిస్తాడని అతని తల్లి సరళా దేవి తెలిపారు. లఖ్నవూలో ఉంటున్న ఆమె.. నిందితుడు అరెస్టయిన అనంతరం స్పందించారు. తన కుమారుడికి శిక్ష నుంచి మినహాయింపు ఏమీ ఉండకపోవచ్చని, ప్రభుత్వం తమకు సముచితమైందే చేస్తుందని వ్యాఖ్యానించారు.
ఇదీ చూడండి: దూబే కోసం పోలీసుల వేట- రౌడీషీటర్ ఇల్లు కూల్చివేత
'' వికాస్.. ఏటా ఉజ్జయిన్ వెళ్తాడు. మహాకాళేశ్వర్ అలయంలో పూజలు చేస్తాడు. దేవుడే అతన్ని కాపాడాడు.
ఇప్పుడు.. ప్రభుత్వం తమకు తోచింది చేస్తుంది. వికాస్ ప్రస్తుతం భాజపాలో లేడు. సమాజ్వాదీలో ఉన్నాడు.''
- సరళా దేవి, వికాస్ దూబే తల్లి
ఈమె వ్యాఖ్యలపై స్పందించిన ఓ సమాజ్వాదీ పార్టీ ప్రతినిధి.. వికాస్ తమ పార్టీలో లేడని స్పష్టం చేశారు. అతనికి కఠిన శిక్ష విధించాలని కోరారు.
ఇవీ చూడండి:
ఎన్కౌంటర్లో 'దూబే' ప్రధాన అనుచరుడు హతం
