ఇక దేశీయంగానే రక్షణ వ్యవస్థల పరిశోధన, అభివృద్ధి

దేశీయ రక్షణ పర్యావరణ వ్యవస్థను బలోపేతం చేసేందుకు కీలక నిర్ణయం తీసుకుంది డీఆర్​డీఓ. ముఖ్యంగా ఆత్మ నిర్భర భారత్​లో భాగంగా.. దేశ రక్షణకు అవసరమైన వ్యవస్థల పరిశోధనలు, అభివృద్ధి కార్యకలాపాలు దేశీయంగా చేయాలని నిర్ణయించింది.

ఆత్మ నిర్భర భారత్‌లో భాగంగా రక్షణ పరిశోధన, అభివృద్థి సంస్థ (డీఆర్​డీఓ) మరో కీలక నిర్ణయం తీసుకుంది. దేశ రక్షణకు అవసరమైన 108 వ్యవస్థలు, ఉప వ్యవస్థలను దేశీయంగానే పరిశోధన, అభివృద్ది, తయారీ చేయాలని నిర్ణయించింది. రక్షణ శాఖ మంత్రి రాజ్​నాథ్‌ సింగ్‌తో జరిగిన భేటీలో ఈ కీలక నిర్ణయాన్ని డీఆర్​డీఓ ప్రకటించింది.

సాంకేతిక పరిజ్ఞాన జాబితా

దేశీయ రక్షణ పర్యావరణ వ్యవస్థను బలోపేతం చేయడానికి ఆత్మ నిర్భర భారత్‌ కింద అనేక కార్యక్రమాలు చేపట్టాలని డీఆర్​డీఓ నిర్ణయించింది. భారత పరిశ్రమల రూపకల్పన, అభివృద్ధి కోసం సాంకేతిక పరిజ్ఞాన జాబితాను రూపొందించింది. అవసరాల ఆధారంగా ఈ వ్యవస్థల రూపకల్పన, అభివృద్ధి, పరీక్షల కోసం పరిశ్రమలకు పూర్తి మద్దతు ఇవ్వనుంది డీఆర్​డీఓ. భారతీయ పరిశ్రమల నుంచి గుర్తింపు పొందిన ఉత్పత్తులను తీసుకోవాలని కేంద్రం ప్రత్యేక ఉత్తర్వులు విడుదల చేయనుంది. క్లిష్టమైన, అధునాతన సాంకేతికతలు, వ్యవస్థల రూపకల్పన, అభివృద్ధిపై దృష్టి పెట్టడానికి డీఆర్​డీఓకే పూర్తి అవకాశం ఉంది.

అభివృద్ది పరిచిన పరిజ్ఞానం, పరికరాల ఉత్పత్తిపై ఇప్పటికే పరిశ్రమలతో డీఆర్​డీఓ భాగస్వామ్య ఒప్పందం చేసుకుంది. ప్రస్తుతం 1800 ఎంఎస్‌ఎంఈలతో పాటు రక్షణ రంగ సంస్థలు, ఆర్డినెన్స్ ఫ్యాక్టరీలు, పెద్ద ఎత్తున పరిశ్రమలతో డీఆర్​డీఓ ఒప్పందాలు చేసుకుంది.

ఇదీ చూడండి:సెప్టెంబర్​ 1 నుంచి మెట్రో రైల్​​ సర్వీసులు!