బస్సులు, ఇతర భారీ వాహనాల్లో సంభవించే అగ్నిప్రమాదాలను 30 సెకన్లలోనే పూర్తిగా నియంత్రించే ఆధునిక వ్యవస్థను అభివృద్ధి చేసినట్లు రక్షణ పరిశోధన, అభివృద్థి సంస్థ(డీఆర్డీవో) ఛైర్మన్ జి. సతీశ్ రెడ్డి పేర్కొన్నారు. ప్రస్తుతం ఈ పరిజ్ఞానాన్ని పరిశ్రమలకు బదిలీ చేస్తున్నామని, దీని వల్ల రాబోయే రోజుల్లో అన్నీ వాహనాల్లోనూ ఈ కొత్త వ్యవస్థను నెలకొల్పడానికి వీలవుతుందన్నారు. ఇటీవల కాలంలో వరుస క్షిపణి ప్రయోగాలతో దేశ రక్షణ సామర్థ్యాన్ని ఇనుమడింపచేసిన డీఆర్డీవో కొత్తగా చేసిన ఆవిష్కరణల గురించి ఆయన ఈటీవీ భారత్తో మాట్లాడారు. ఈ పూర్తి వివరాలు ఆయన మాటల్లోనే..
బస్సుల్లో అగ్నిప్రమాదాల నివారణకు డీఆర్డీవో పరిష్కారం చూపగలదా? అని కేంద్ర రవాణాశాఖ కార్యదర్శి గిరిధర్ మమ్మల్ని అడిగారు. జలాంతర్గాములు, నౌకలు, యుద్ధట్యాంకుల్లో అగ్నిప్రమాదాల నివారణకు ప్రయోగాలు చేసిన మా 'సీఫెస్' (సెంటర్ ఫర్ ఫైర్ ఎక్స్ప్లోజివ్స్ ఎన్విరాన్మెంట్ సేఫ్టీ) సంస్థకు ఆ బాధ్యతను అప్పగించాం. విస్తృత పరిశోధనల అనంతరం.. బస్సుల్లో అగ్ని ప్రమాదాల నివారణకు అవసరమైన సాధనాలను అభివృద్ధి చేశాం. రాబోయే రోజుల్లో దీన్ని కార్యాచరణలో పెట్టి అన్ని బస్సుల్లో అగ్నిప్రమాదాల నివారణకు చర్యలు తీసుకుంటాం.
డీఆర్డీవో రూపొందించిన పరికరం బస్సుల్లో అగ్నిప్రమాద ముప్పును పసిగట్టి, ఆ వెంటనే దాన్ని ఆర్పివేయడానికి చిన్నపాటి నీటితుంపర్లును విడుదల చేస్తుంది. 10 నుంచి 30 సెకన్లలోపే మంటలు పూర్తిగా ఆర్పేంత శక్తిమంతంగా అవి ఉంటాయి. ఇంజన్ కంపార్ట్మెంట్ కోసం ఏరోసోల్ యంత్రాన్ని రూపొందించాం. ప్రమాదాన్ని పసిగట్టిన వెంటనే వాయువులు విడుదల చేసి, 5 సెకన్లలోనే ఇంజిన్ విభాగంలో మంటలను ఆర్పేస్తుంది. ఈ పరిజ్ఞానాన్ని పరిశ్రమలకు బదిలీ చేశాం.
ఎగుమతుల పెంపుపై దృష్టి..
క్షిపణి, రాడార్, సోనార్, టోర్పిడో, ఎలక్ట్రానిక్ యుద్ధ ఉపకరణాలు, తుపాకులు, కమ్యూనికేషన్ వ్యవస్థల్లో మనం మంచి పురోగతి సాధించాం. ఈ రంగాల్లో రూపొందించిన పరికరాలను కేంద్ర ప్రభుత్వం అనుమతించిన దేశాలకు ఎగమతి చేయడానికి సిద్ధంగా ఉన్నాం. అలాగే ఆయుధ దిగుమతులు తగ్గించుకోవడానికి కొత్తరకం యుద్ధవిమానాలు, తుపాకులు, ట్యాంకులు, తయారు చేయడానికి డిజైన్లపై కసరత్తు చేస్తున్నాం. స్వయం సమృద్ధికి ఉద్దేశించిన 'ఆత్మనిర్భర్ భారత్' కలను సాకారం చేయడానికి దేశీయ సంస్థలకు ప్రోత్సాహం అందిస్తున్నాం. విదేశాలు ఆధునిక ఆయుధ పరిజ్ఞానాన్ని మనకు ఇవ్వవు. అందువల్ల డీఆర్డీవో, విశ్వవిద్యాలయాలు, పరిశ్రమలు కలిసి దేశంలోనే అత్యాధునిక పరికరాలు తయారు చేయాలని లక్ష్యంగా పెట్టుకున్నాం. ప్రధానమంత్రి నరేంద్రమోదీ 101 రకాల రక్షణ ఉపకరణాల దిగుమతులను పూర్తిగా నిషేధించారు. వాటిని ఇక్కడే తయారుచేయాలన్న లక్ష్యాన్ని నిర్దేశించారు. పరిశ్రమల్లో పరిశోధనలను ప్రోత్సహించేందుకు 108 పరికరాలను వాటికే ప్రత్యేకించారు. డీఆర్డీవోలోని సౌకర్యాలను ఉపయోగించుకునే అవకాశాన్ని పరిశ్రమలకు కల్పించాం. ఎత్తైన ప్రదేశాల్లో పనిచేసే సైనికులకు ఆక్సిజన్ బెడ్లు, మైనస్ 40 డిగ్రీల చలిని తట్టుకునే దుస్తులు,మంచులో నడిచేందుకు ఉపయోగపడే బూట్లు, మంచు నుంచి నీరు తయారుచేసే పరిజ్ఞానాలపై డీఆర్డీవో ప్రయోగాలు చేస్తోంది.
అవిశ్రాంత కృషి వల్లే వరుస క్షిపణి పరీక్షలు...
కొవిడ్ సమయంలోనూ శాస్త్రవేత్తలు అవిశ్రాంతంగా కృషి చేశారు. అందువల్లే పలు క్షిపణి వ్యవస్థలు తయారయ్యాయి. అన్లాక్ మొదలైన తర్వాత వాటిని ప్రయోగించేందుకు అనుమతించాం. రక్షణ సాంకేతిక పరిజ్ఞానంలో మనం వెనుకంజలో లేమనే విషయాన్ని చాటిచెప్పాం.
-జి. సతీష్ రెడ్డి, డీఆర్డీవో ఛైర్మన్
