వాట్సాప్ బదులు వేరే యాప్ వాడండి: హైకోర్టు

వాట్సాప్ నూతన ప్రైవసీ పాలసీని అంగీకరించకపోతే.. యాప్​ నుంచి వైదొలగాలని దిల్లీ హైకోర్టు పేర్కొంది. నిబంధనలకు సమ్మతి తెలపడం తప్పనిసరి కాదని, అవసరమైతే ఇతర యాప్​లను ఉపయోగించుకోవాలని స్పష్టం చేసింది.

వాట్సాప్ ప్రవేశపెట్టిన నూతన ప్రైవసీ పాలసీని అంగీకరించడం ఐచ్ఛికమేనని, వాటితో ఏకీభవించకపోతే ఆ ప్లాట్​ఫాం నుంచి వైదొలగాలని దిల్లీ హైకోర్టు స్పష్టం చేసింది. వాట్సాప్ ఒక ప్రైవేట్ యాప్ మాత్రమేనని, అవసరమైతే ఇతర అప్లికేషన్లను ఉపయోగించుకోవాలని సూచించింది. వాట్సాప్ నూతన పాలసీని సవాల్ చేస్తూ ఓ న్యాయవాది దాఖలు చేసిన వ్యాజ్యంపై విచారణ సందర్భంగా ఈ వ్యాఖ్యలు చేసింది.

"ఇతర యాప్​లు విధించే నిబంధనల(టర్మ్స్ అండ్ కండిషన్స్)ను గమనిస్తే మీరు వేటిని అంగీకరిస్తున్నారో తెలుసుకొని ఆశ్చర్యపోతారు. గూగుల్ మ్యాప్స్ సైతం మీ సమాచారం మొత్తాన్ని సేకరించి, సేవ్ చేసుకుంటుంది. మీరు(పిటిషనర్) చెప్తున్న ప్రకారం ఏ సమాచారం లీక్ అవుతుందో మాకు అర్థం కావట్లేదు. అదొక(వాట్సాప్) ప్రైవేట్ యాప్. నిబంధనలు అంగీకరించడం ఐచ్ఛికమే. అంగీకరించకండి. వేరే యాప్ వాడండి."

-దిల్లీ హైకోర్టు

వాట్సాప్ నూతన ప్రైవసీ వివాదాన్ని సమగ్రంగా పరిశీలించాల్సి ఉందని హైకోర్టు అభిప్రాయపడింది. విచారణను జనవరి 25కు వాయిదా వేసింది.

ఇదీ చదవండి: వాట్సాప్‌ నూతన విధానం- గోప్యతా హక్కుకు తూట్లు

కొత్త పాలసీ వినియోగదారుల గోప్యతా హక్కులను ఉల్లంఘిస్తుందని పిటిషనర్ వాదించారు. ప్రభుత్వ పర్యవేక్షణ లేకుండానే యూజర్ల యాక్టివిటీ మొత్తం వాట్సాప్​కు తెలిసిపోతుందని అన్నారు.

అయితే ఫేస్​బుక్, వాట్సాప్ తరఫున హాజరైన సీనియర్ న్యాయవాదులు కపిల్ సిబల్, ముకుల్ రోహత్గీ పిటిషనర్ ఆరోపణలను తోసిపుచ్చారు. ప్రైవేట్ చాట్లపై ఎన్​క్రిప్షన్ కొనసాగుతూనే ఉంటుందని స్పష్టం చేశారు. ప్రస్తుత పాలసీ బిజినెస్ యూజర్లకు సంబంధించినదే అని తెలిపారు.

ఇదీ చదవండి: వాట్సాప్ వద్దనుకుంటే.. ఈ యాప్​లు ట్రై చేయండి!