కారు దిగలేదని వైద్యుడిపై దుండగుల కాల్పులు!

ఉత్తర్​ప్రదేశ్ లఖ్​నవూలో దారుణం జరిగింది. గుర్తుతెలియని వ్యక్తులు ఓ వైద్యుడి కారును అడ్డగించి, అతడ్ని కాల్చి.. ఆ కారులోనే పారిపోయారు. ప్రస్తుతం వైద్యుడి పరిస్థితి నిలకడగా ఉన్నట్లు అధికారులు వెల్లడించారు.

దేశవ్యాప్తంగా లాక్​డౌన్​ అమల్లో ఉన్నప్పటికీ అక్కడక్కడా నేరాలు జరగుతూనే ఉన్నాయి. ఉత్తర్​ప్రదేశ్ లఖ్​నవూలోని సుశాంత్ గల్ఫ్ నగరంలో దారుణం చోటుచేసుకుంది. కొంతమంది దుండగులు ఓ వైద్యుడ్ని కాల్చి.. అతని కారులోనే పరారయ్యారని పోలీసులు తెలిపారు.

ఇదీ జరిగింది!

కింగ్​జార్జ్ వైద్య విశ్వవిద్యాలయం (కేజీఎంయూ)లో కమ్యూనిటీ మెడిసిన్ విభాగానికి చెందిన వికే సింగ్ అనే వైద్యుడు.. ఖేరా గ్రామంలోని తన సోదరుడి ఇంటి నుంచి వస్తుండగా ఈ ఘటన జరిగిందని పోలీసులు తెలిపారు.

"ఇద్దరు వ్యక్తులు కారును అడ్డుకొని అతడ్ని బయటకు దిగమన్నారు. అయితే అందుకు ఆయన నిరాకరించడం వల్ల కాల్చి... అతని కారులోనే పారిపోయారు" - పోలీసులు

క్షేమం..

గాయపడిన వైద్యుడ్ని విశ్వవిద్యాలయంలోని గాయాల వార్డులో చేర్చామని.. అతని పరిస్థితి నిలకడగా ఉందని తెలిపారు.

ఇదీ చూడండి: భారత్​లో కరోనా విజృంభణ- ఒక్కరోజులో 47మంది మృతి