2020 సంవత్సరం ఎందరో జీవితాల్లో చేదు జ్ఞాపకంలా మిగిలిపోయింది. వచ్చే ఏడాది తమ జీవితాల్లో కొత్త చిగురు తొడుగుకుంటాయనే ఆశతో అందరూ నూతన సంవత్సరంలోకి అడుగుపెట్టారు. ఈ సందర్భంగా దేశవ్యాప్తంగా ప్రముఖ దేవాలయాల్లో ప్రజలు ప్రత్యేక పూజలు నిర్వహించారు. ఆలయాలు భక్తుల తాకిడితో కిటకిటలాడాయి.
కశ్మీర్లో... కోల్కతాలో..
జమ్ము కశ్మీర్లోని వైష్ణోదేవి ఆలయం రద్దీగా మారింది. ఖాత్రాలో ఉన్న ఈ ఆలయంలో అమ్మవారిని దర్శించుకోవడానికి భారీ సంఖ్యలో భక్తులు తరలివచ్చారు.
కోల్కతాలోని కాళీ ఆలయం కూడా భక్తులతో కిటకిటలాడింది. వీలైనంత త్వరగా వ్యాక్సిన్ రావాలని కోరుకుంటున్నానని ఓ భక్తురాలు తెలిపారు.
దిల్లీలో రద్దీ..
దిల్లీలోని లోధి రోడ్డులో ఉన్న సాయిబాబా మందిరంలో పూజలు నిర్వహించడానికి భక్తులు భారీ సంఖ్యలో తరలివచ్చారు. గురుద్వారా బంగ్లా సాహిబ్లో భక్తులు పూజలు నిర్వహించారు. ఈ ఏడాది అందరికీ మంచి జరుగుతుందని ఆశిస్తున్నానని ఓ భక్తురాలు తెలిపారు.
గంగాహారతితో..
ఉత్తర్ప్రదేశ్లోని వారణాసిలో ప్రజలు గంగాహారతితో నూతన సంవత్సరాన్ని స్వాగతించారు.
బిహార్ రాజధాని పట్నాలోని మహవీర్ ఆలయం భక్తుల తాకిడితో రద్దీగా మారింది.
ముంబయిలోని ప్రముఖ సిద్ధివినాయక ఆలయంలో నూతన సంవత్సరం సందర్భంగా భక్తులు పూజలు నిర్వహించారు.
రైతు సమస్యలు తీరుతాయని..
పంజాబ్లోని గోల్డెన్ టెంపుల్ను దర్శించుకోవడానికి భక్తులు భారీ సంఖ్యలో వచ్చారు. అందరికీ మంచి జరగాలని కోరుకున్నామని, రైతు సమస్యలు తీరుతాయని ఆశిస్తున్నామని భక్తులు తెలిపారు.
బెంగుళూరులోని మల్లేశ్వరం లక్ష్మీ నరసింహ స్వామి ఆలయంలో ప్రత్యేక పూజలు నిర్వహించారు.
ఇదీ చూడండి : రాజకీయాల కోసం చదువుకు దూరమవ్వలేను: ఆర్య
