ట్రాక్టర్ ర్యాలీలో చెలరేగిన హింసకు రైతు సంఘాల నేతలే బాధ్యత వహించాలని దిల్లీ పోలీసులు వెల్లడించారు. నేతలు విద్వేష ప్రసంగాలు చేశారని, ఘర్షణల్లో పాలుపంచుకున్నారని ఆరోపించారు. వీరి వల్ల 394మందికిపైగా పోలీసు సిబ్బంది గాయపడినట్టు.. నేరానికి పాల్పడిన ఏ ఒక్కరినీ వదలమని తేల్చిచెప్పారు.
ట్రాక్టర్ ర్యాలీ విధ్వంసం జరిగిన ఒక రోజు అనంతరం మీడియాతో మాట్లాడారు దిల్లీ పోలీస్ కమిషనర్ ఎస్ఎన్ శ్రీవాస్తవ. రైతులు నిబంధనలను ఉల్లంఘించి ద్రోహం చేశారని మండిపడ్డారు.
"రైతులు నిబంధనలు ఉల్లంఘించి.. నిర్దేశించిన సమయానికి ముందే ట్రాక్టర్ ర్యాలీ ప్రారంభించారు. ఇతర మార్గాల్లో నగరంలోకి ప్రవేశించారు. బారికేడ్లను తోసుకుని దిల్లీలోకి ప్రవేశించారు. అన్నదాతలను నియంత్రించడానికే బాష్పవాయువు, జలఫిరంగులు ఉపయోగించాం. దీని వల్ల జరిగిన హింసాకాండకు రైతు నాయకులే భాద్యత వహించాలి."
-- ఎన్ శ్రీవాస్తవ, దిల్లీ పోలీసు కమిషనర్
ఇప్పటివరకు 25 ఎఫ్ఐఆర్లు నమోదుచేసినట్టు.. సీసీటీవీ ఆధారంగా నిందితులను పట్టుకునేందుకు ప్రయత్నిస్తున్నట్టు వెల్లడించారు శ్రీవాస్తవ.
అయితే పోలీసులు నిగ్రహంతో ఉండటం వల్లే ఏ ఒక్కరూ ప్రాణాలు కోల్పోలేదని పేర్కొన్నారు శ్రీవాస్తవ.
సాగుచట్టాలకు వ్యతిరేకంగా రైతులు చేపట్టిన ట్రాక్టర్ ర్యాలీ హింసకు దారితీసింది. నిరసనకారులు నిర్దేశిత మార్గాలు, నిర్ణీత సమయం వంటి నిబంధనలను పక్కనపెట్టి దిల్లీలోకి దూసుకెళ్లారు. ఈ క్రమంలో పోలీసులు-రైతుల మధ్య ఘర్షణ చెలరేగింది.
ఇదీ చూడండి: 'ట్రాక్టర్ ర్యాలీ'తో రైతు ఉద్యమానికి బీటలు!
