ఆర్థిక సంక్షోభంతో తాత్కాలికంగా మూతపడ్డ జెట్ ఎయిర్వేస్కు దిల్లీ హైకోర్టు నోటీసులు పంపించింది. రద్దు చేసిన విమానాల్లో టికెట్ బుక్ చేసుకున్న ప్రయాణికులకు డబ్బులు తిరిగి చెల్లించటం, ప్రత్యామ్నాయ విమానాల సదుపాయం అందే విధంగా చూడాలన్న పిటిషన్పై తాఖీదులు జారీచేసింది.
జెట్ ఎయిర్వేస్ వ్యవహారంపై ప్రమాణపత్రం దాఖలు చేయాలని డీజీసీఏతో పాటు విమానయాన శాఖను ప్రధాన న్యాయమూర్తి జస్టిస్ రాజేంద్ర మీనన్ నేతృత్వంలో ధర్మాసనం ఆదేశించింది. ఈ పిటిషన్పై తదుపరి వాదనలు జులై 16న జరగనున్నాయి.
పిటిషనర్ లేవనెత్తిన అంశాలు...
బెజన్ కుమార్ మిశ్రా అనే సామాజిక కార్యకర్త దాఖలు చేసిన ఈ పిటిషన్లో... మిగతా విమానయాన సంస్థలు టికెట్ ధరలను పెంచటం వల్ల టికెట్ బుక్ చేసుకున్న వారు చాలా ఇబ్బందులు ఎదుర్కోవాల్సి వస్తోందని పేర్కొన్నారు. ఇప్పటి వరకు ప్రభుత్వం ఎలాంటి చర్యలు తీసుకోలేదని తెలిపారు.
ప్రయాణికులు టికెట్ల కోసం చెల్లించిన రూ.360 కోట్లు నష్టపోవాల్సి ఉంటుందన్న మీడియా నివేదికను ఉటంకించారు పిటిషనర్. రెండున్నర సంవత్సరాల నుంచి పరిస్థితి బాగోలేనప్పటికీ అధికారులు టికెట్ అమ్మకాలకు అనుమతించారని తెలిపారు.
ఇదీ చూడండి : అసాంజే సమాధానం చెప్పాల్సిందే: హిల్లరీ
