అత్యాధునిక సాంకేతికతలు, అంతరిక్షంపై పట్టు సాధించినా.. దేశంలో కుల వివక్ష జాడ్యం పోవటం లేదు. కులం పేరిట తోటి మనిషిని అవమానించే తీరును మార్చుకోలేకపోతున్నాం. దేశంలో అణగారిన వర్గాలు.. ముఖ్యంగా మహిళలపై వివక్ష ఏ స్థాయిలో ఉందో తెలిపే ఓ ఫొటో ప్రస్తుతం సామాజిక మాధ్యమాల్లో వైరల్ అవుతోంది.
తమిళనాడులోని ఓ గ్రామ పంచాయతీ సమావేశంలో ప్రెసిడెంట్ను కింద కూర్చోబెట్టిన వైనంపై తీవ్ర స్థాయిలో విమర్శలు వెల్లువెత్తుతున్నాయి. కడలూరు జిల్లా తీర్కుత్తిట్టయిలో జరిగిన ఈ ఘటనపై ఉన్నతాధికారులు కఠిన చర్యలకు ఉపక్రమించారు.
అట్రాసిటీ కేసు..
గ్రామ ప్రెసిడెంట్ రాజేశ్వరి ఫిర్యాదు మేరకు భువనగిరి పోలీసులు కేసు నమోదు చేశారు. పంచాయతీ ఉపాధ్యక్షుడు మోహన్రాజ్, కార్యదర్శి సింధుజపై ఎస్సీ, ఎస్టీ అట్రాసిటీ కేసు కింద ఎఫ్ఐఆర్ నమోదు చేశారు. ఈ విషయంలో దర్యాప్తునకు ఆదేశించింది జిల్లా పరిపాలన విభాగం.
జిల్లా కలెక్టర్ చంద్రశేకర్, ఎస్పీ శ్రీ అభినవ్ గ్రామానికి వచ్చి రాజేశ్వరి వాంగ్మూలాన్ని తీసుకున్నారు. ఈ విషయాన్ని తమ దృష్టికి తీసుకురాకుండా నిర్లక్ష్యంగా వ్యవహరించిన కార్యదర్శి సింధుజను విధుల నుంచి తొలగించారు.
అసలేం జరిగింది..
రాజేశ్వరి.. ఈ ఏడాది జనవరిలో పంచాయతీ ప్రెసిడెంట్‌గా గెలిచారు. ఆమె దళిత వర్గానికి చెందిన మహిళ. ఈ నేపథ్యంలో పంచాయతీ సమావేశాల్లో మిగతా సభ్యులంతా, కుర్చీలపై ఆసీనులైతే.. రాజేశ్వరిని మాత్రం కిందనే కూర్చొమనేవారు. గత కొన్నాళ్లుగా జరుగుతున్న ఈ వివక్షపూరిత చర్యకు సంబంధించిన దృశ్యాలను కొంతమంది ఫొటోలు తీసి సోషల్‌ మీడియాలో పోస్ట్‌ చేశారు. ఈ విషయంపై రాజేశ్వరి కూడా మీడియాతో మాట్లాడారు.
"నా సామాజిక వర్గాన్ని కారణంగా చూపి మోహన్రాజ్ నన్ను కింద కూర్చోబెట్టాడు. ప్రెసిడెంట్ కుర్చీలో ఆయనే కూర్చుంటాడు. సమావేశాల్లో అందరికీ కుర్చీలు ఉంటాయి. నాకు తప్ప. అంతేకాదు జెండా ఎగురవేసేందుకు కూడా నన్ను అనుమతించరు. జెండావిష్కరణ కోసం ముందురోజు అన్ని ఏర్పాట్లు మేమే పూర్తి చేశాం. కానీ వాళ్ల నాన్నతోనే ఆ కార్యక్రమం పూర్తి చేయించాడు. ఏం చేసేది లేక అక్కడి నుంచి వెళ్లిపోయాం."
- రాజేశ్వరి, తిర్కుత్తిట్టయి ప్రెసిడెంట్
కనిమొళి స్పందన..
ఈ ఘటనపై స్పందించిన డీఎంకే నేత, ఎంపీ కనిమొళి.. రాజేశ్వరిపై వివక్ష చూపడాన్ని ఖండిస్తున్నట్లు తెలిపారు. కులం అనేది మూర్ఖపు అంశమని, ప్రజలు ఈ విషయాన్ని అర్థం చేసుకోవాలని కోరారు. రాష్ట్రంలో కుల వివక్షను నిర్మూలించేందుకే ద్రవిడ ఉద్యమాన్ని పెరియార్ ప్రారంభించారని గుర్తు చేశారు.
ఇదీ చూడండి: ఆడబిడ్డల పట్ల దుర్విచక్షణ ఏనాటికైనా అంతమయ్యేనా..?
