కరోనా వైరస్ను నియంత్రించేందుకు తక్కువ స్థాయి నిబంధనలు సరిపోతాయని ప్రముఖ వైరాలజీ నిపుణులు జాకబ్ జాన్ అభిప్రాయపడ్డారు. నిబంధనలను కఠినంగా అమలు చేస్తూనే ఆర్థిక కార్యకలాపాలకు అనుమతి ఇవ్చచ్చని చెబుతున్నారు.
ఈటీవీ భారత్ ప్రతినిధితో ప్రత్యేకంగా మాట్లాడిన ఆయన.. వైరస్ నియంత్రణ, వ్యాక్సిన్ తయారీపై అనేక విషయాలను వెల్లడించారు.
ప్రశ్న: దేశంలో దశలవారీగా లాక్డౌన్ సడలింపులు ఇస్తున్నారు. ఈ పరిస్థితుల్లో మనం కరోనా వ్యాప్తిని నియంత్రించగలమా? ఆర్థిక కార్యకలాపాలకు అనుమతిస్తూ కరోనా వ్యాప్తిని అడ్డుకునేందుకు తీసుకోవల్సిన చర్యలు ఏంటి?
జ: దీన్ని మనం రెండు విధాలుగా చూడాలి. ఒకటి.. మార్చి 25 నుంచి ఏప్రిల్ 14 వరకు లాక్డౌన్ ఉన్నా కేసులు పెరిగాయి. 20 రోజుల్లో 20 రెట్లు పెరిగాయి. ఆర్థిక వ్యవస్థ కుంటుపడుతున్న విషయం నిజమే. అయితే వైరస్ వ్యాప్తి అనుకున్న స్థాయిలో నియంత్రణలోకి రాలేదు. కానీ అదే వ్యాప్తి అరికట్టేందుకు సరైన సమయం. అప్పుడే మాస్కుల ప్రాముఖ్యం మనందరికీ తెలిసింది. ఆ సమయంలోనే మరింత కఠినంగా వ్యవహరించి ఉంటే ఆర్థిక వ్యవస్థకు ఇబ్బంది కలగకుండా మంచి ఫలితాలు వచ్చి ఉండేవి.
తర్వాతి దశలో భౌతిక దూరాన్ని 6 అడుగుల నుంచి 2,3 అడుగులకు తగ్గించి ఉండాల్సింది. ఆర్థిక, సామాజిక, విద్యా, రవాణా తదితర కార్యకలాపాలను ఏప్రిల్ 15 నుంచి పునరుద్ధరించి ఉంటే బాగుండేది. అయితే ముందు జాగ్రత్త చర్యగా వృద్ధులు, ఇతర దీర్ఘకాలిక సమస్యలతో బాధపడుతున్నవారిని నిర్బంధంలోనే ఉంచాలి.
నిజానికీ రెండోసారి లాక్డౌన్ పొడిగించినప్పుడు విభేదించాను. మూడోసారి కూడా పొడిగించేసరికి నిరాశ పడ్డాను.
ప్రశ్న: సిటీ బస్సులు, సబ్అర్బన్ రైళ్లలో ప్రయాణికులపై చాలా ఆంక్షలు విధించేందుకు ప్రభుత్వం కసరత్తు చేస్తోంది. ప్రజా రవాణా వ్యవస్థలో ప్రయాణిస్తూ భౌతిక దూరం నిబంధనలను పాటించటం సాధ్యమవుతుందా?
జ: దీనికి చాలా సరళమైన పరిష్కారం ఉంది. భౌతిక దూరాన్ని 2 నుంచి 3 అడుగులకు పరిమితం చేసి మాస్కులు ధరించేలా నిబంధనలు అమలు చేయాలి. మాస్కులు ధరించి ఎవరి పని వాళ్లు చేసుకోవచ్చు. అయితే ఈ మహమ్మారి అంతమయ్యేంత వరకూ ఎట్టి పరిస్థితుల్లోనూ సామాజిక కార్యక్రమాలకు దూరంగా ఉండాలి. ఇదే అన్నింటికన్నా ముఖ్యం.
ప్రశ్న: ఉష్ణోగ్రతకు కరోనా వ్యాప్తికి ఏమైనా సంబంధం ఉందా? తమిళనాడులో విపరీతమైన ఎండలు ఉన్నాయి. ఇది అక్కడ కరోనా వ్యాప్తిని ప్రభావితం చేస్తుందా?
జ: వాతావరణంలో ఎంత వేడి అయినా ఉండనివ్వండి... మన శరీరంలోనే ఎప్పుడూ 37 డిగ్రీల ఉష్ణోగ్రత ఉంటుంది. అయినప్పటికీ వైరస్ పెరుగుతుంది. తుంపర్ల ద్వారా వ్యాపిస్తుంది. వాటిని గ్రహించటం ద్వారా ఇతరులకు సోకుతుంది. "ఫొమైట్ ట్రాన్సిమిషన్" తగ్గే అవకాశం ఉంది. అంటే ఉపరితలాలు, వస్తువుల నుంచి సంక్రమించే అవకాశం ఉండకపోవచ్చు. అయితే వేడి వాతావరణం వైరస్ను నియంత్రిస్తుందని చెప్పలేం. కొద్దిమేర తగ్గవచ్చు. కానీ వర్షాకాలంలో వాతావరణం చల్లబడితే మళ్లీ విజృంభించవచ్చు.
ప్రశ్న: నైరుతి రుతుపవాలు ప్రారంభమైతే మళ్లీ వైరస్ వేగంగా విస్తరిస్తుందా? వర్షాలు పడకుంటే వ్యాప్తి నియంత్రణలో ఉండే అవకాశం ఉందంటున్నారా?
జ: వర్షాకాలంలో ఏం జరుగుతుందో చెప్పలేం? వేచి చూడాల్సిందే!
ప్రశ్న: భారత్లో మరణాల రేటు చాలా తక్కువగా ఉంది. ఐరోపా, అమెరికన్లతో పోలిస్తే భారతీయుల్లో రోగనిరోధక శక్తి ఎక్కవగా ఉందా?
జ: కరోనా విషయంలో మరణాల రేటు అనేది.. వృద్ధులు, దీర్ఘకాలిక సమస్యలతో బాధపడేవారి సంఖ్యపై ఆధారపడి ఉంటుంది. అమెరికాతో పోలిస్తే వీరి సంఖ్య భారత్లో తక్కువగా ఉంది. మొదటి 3వారాల లాక్డౌన్ తర్వాత కఠిన చర్యలు తీసుకోకపోవటానికి ఇదే కారణం. అందుకే ఏప్రిల్ 15 తర్వాత లాక్డౌన్ ఉండదని మోదీ ప్రభుత్వం అప్పుడు హామీ ఇచ్చింది. అయితే మన దగ్గర తీవ్రత తక్కువగానే ఉంది. ఇతర దేశాల్లో వృద్ధులు అధికంగా ఉన్నవారు.. ముఖ్యంగా వృద్ధాశ్రమాలు ఎక్కువగా ఉండే చోట ఎక్కువ సమస్యలు ఉంటాయి.
ప్రశ్న: భారతీయుల వంటల్లో అల్లం, వెల్లుల్లి, మిరియాలు వంటివి అధికంగా వినియోగిస్తారు. ఇవి వైరస్ను ఎదుర్కొనేందుకు సహకరిస్తాయా? ఆహారపు అలవాట్లకు రోగనిరోధక శక్తికి ఏమైనా సంబంధం ఉందా?
జ: మంచి ఆహారపు అలవాట్లు, వ్యాయామం మన రోగనిరోధక శక్తిని పెంచుతాయి. కృత్రిమ పద్ధతులు ఉపయోగకరంగా ఉండవు. రోగ నిరోధక శక్తిని కాపాడుకోగలిగితే ఊబకాయం సమస్యను నియంత్రించుకోగలం. చక్కెర వంటి దీర్ఘకాలిక వ్యాధులు నియంత్రణలో ఉంటాయి.
ప్రశ్న: ఈ మహమ్మారి ఎప్పుడు, ఎలా అంతమవుతుంది? దీనికి వ్యాక్సిన్ ఎప్పుడు వస్తుంది? కరోనా వైరస్కు ప్రజల్లో రోగనిరోధక శక్తి పెరుగుతుందా?
జ: టీకాలను కనుగొనే వరకూ ఈ మహమ్మారి బెడద తొలగిపోదు. ఈ ఇన్ఫెక్షన్.. ఫ్లూ తరహా ప్రవర్తిస్తోంది. సీజనల్గా వచ్చే ప్రమాదం ఉంది. ఒకసారి వ్యాధి సంక్రమిస్తేనే యాంటీబాడీలు పెరిగి రోగనిరోధక శక్తి వస్తుంది.
వైరస్ సోకినవాళ్లలో 80శాతం మందిలో లక్షణాలు కనిపించటం లేదు. సోకిన వ్యక్తే వైరస్ సంక్రమించినట్లు గుర్తించటం లేదు. అందుకే తప్పనిసరిగా మాస్కులు ధరించాలి. జులై- ఆగస్టు మధ్య కాలంలో వైరస్ వ్యాప్తి తీవ్రమవుతుందని అంచనా వేస్తున్నాం. ఈ ఏడాది చివర్లో లేదా 2021 తొలినాళ్లలో వైరస్ వ్యాప్తి అంతమవచ్చు. త్వరలోనే ఔషధాలు అందుబాటులోకి వస్తాయి. ఇప్పటి వరకు హెచ్ఐవీకి ఉపయోగించే రెమ్డెసివిర్ ప్రభావవంతంగా పనిచేస్తోంది. 2021 ప్రారంభంలో వ్యాక్సిన్లు అందుబాటులోకి వస్తాయని భావిస్తున్నా.
జాకబ్ జాన్ గురించి..
ఇండియన్ అకాడమీ అఫ్ పీడియాట్రిక్స్కు అధ్యక్షుడిగా వ్యవహరించారు జాకబ్. ప్రస్తుతం వెల్లూరు రోటరీ క్లబ్ క్షయ నియంత్రణ సంఘానికి ఛైర్మన్గా ఉన్నారు. అంటువ్యాధులపై పరిశోధించేందుకు దేశంలో తొలిసారిగా వైరాలజీ ల్యాబ్ను స్థాపించారు.
పోలియోపై..
హెపటైటిస్-బీకి సంబంధించి పలు కీలక విషయాలను 1972లో గుర్తించారు. పోలియో కేసుల్లో వ్యాక్సిన్ వైఫల్యం గురించి నివేదిక అందించారు. వ్యాక్సిన్ తయారీకి సంబంధించి చాలా సూచనలు చేశారు. పల్స్ వ్యాక్సినేషన్ పద్ధతిలోనూ అనేక మార్పులను సూచించారు. జాకబ్ ప్రవేశపెట్టిన మోడల్ను పోలియో వ్యాక్సినేషన్లో ప్రపంచవ్యాప్తంగా వినియోగిస్తున్నారు.
హెచ్ఐవీకి సంబంధించి..
రెట్రోవైరస్ లేబొరేటరీని జాకబ్ 1986లో స్థాపించారు. దేశంలో తొలిసారిగా సెక్స్ వర్కర్లలో హెచ్ఐవీని గుర్తించారు. హెచ్ఐవీపై నిఘా పెట్టేందుకు ఐసీఎంఆర్ టాస్క్ఫోర్స్ను ప్రారంభించేందుకు మార్గనిర్దేశం చేశారు.
