వివిధ దేశాల్లో అత్యవసర వినియోగం కోసం వినియోగించేందుకు.. కరోనా వ్యాక్సిన్ అందుబాటులోకి వచ్చింది. మన దేశంలోనూ త్వరలోనే వచ్చే సూచనల కనపడుతున్నాయి. కానీ, ప్రజల్లో టీకా సమర్థతపై ఎన్నో అనుమానాలు, అపోహలు ఉన్నాయి. ఇవి చాలదన్నట్టు.. వ్యాక్సిన్ వేయించుకుంటే వివిధ కొత్త సమస్యలు ఎదురువుతాయని వదంతులు వ్యాపిస్తున్నాయి. అందుకే.. టీకాలు సురక్షితమని చాటేందుకు వివిధ దేశాల్లో అధ్యక్షులు, ప్రముఖులు, రాజకీయ నేతల వంటి వారు మొదటగా వ్యాక్సినేషన్ చేయించుకుంటున్నారు.
ఇంతకీ వ్యాక్సిన్ పట్ల ప్రజల్లో ఉన్న అనుమానాలు ఏంటి? వాటిలో నిజమెంత?
అపోహ: వ్యాక్సిన్ను హడావుడిగా తెచ్చారు. అందుకే అది సురక్షితమైంది కాదు.
వాస్తవం: చాలా కొవిడ్ వ్యాక్సిన్లు వేగంగా అభివృద్ధి చేశారనేది నిజమే. కానీ, ఆ వ్యాక్సిన్లు ఏ విధమైన భద్రతా ప్రమాణాలు పాటించకుండానే తీసుకువస్తున్నారనేది అవాస్తవం. టీకా ఉత్పత్తిదారులు ఎలాంటి పరిస్థితుల్లోనైనా.. అభివృద్ధి ప్రక్రియలను తప్పనిసరిగా పాటించాల్సి ఉంటుంది. ఆ టీకాలు సురక్షితమైనవి, సమర్థమైనవని నిరూపించుకునేందుకు విస్తృతంగా క్లినికల్ ట్రయల్స్ నిర్వహించాలి. అప్పుడే అత్యవసర వినియోగానికి అనుమతి లభిస్తుంది.
అపోహ: వ్యాక్సిన్ తీసుకుంటే కొవిడ్ సోకుతుంది.
వాస్తవం: అన్ని వ్యాక్సిన్లలాగే కొవిడ్ వ్యాక్సిన్ కూడా.. వ్యాధిని అనుకరించి రోగ నిరోధక శక్తిని పెంపొందిస్తుంది. దానివల్ల అస్వస్థత లక్షణాలు కనిపించినా.. అవి నిజమైనవి కావు. సార్స్ కొవ్-2 వైరస్ను గుర్తించడానికి రోగనిరోధక వ్యవస్థకు కొవిడ్ టీకా శిక్షణ ఇస్తుంది. అయితే.. టీకా తీసుకున్న తర్వాత రోగ నిరోధక శక్తి పొందడానికి కాస్త సమయం పడుతుందనేది అందరూ గుర్తుంచుకోవాలి.
అపోహ: ఎమ్ఆర్ఎన్ఏ టీకాలు మన డీఎన్ఏ నిర్మాణాన్ని మార్చేస్తాయి.
వాస్తవం: ఎమ్ఆర్ఎన్ఏ సాంకేతికతో తయారైన టీకాలు.. వైరస్ జన్యుపదార్థాన్ని ఉపయోగించుకుని సార్స్ కొవ్-2 వైరస్ ఉపరితలంపై ఉండే ప్రొటీన్ను మన శరీరం ఉత్పత్తి చేసేలా చేస్తాయి. ఫలితంగా.. ఆ ప్రొటీన్లను రోగ నిరోధక వ్యవస్థ గుర్తించి యాంటీబాడీలు ఉత్పత్తి చేస్తుంది. అయితే.. ఎమ్ఆర్ఎన్ఏ కు, డీఎన్ఏకు సంబంధమూ లేదు. ఈ ఎమ్ఆర్ఎన్ఏ మానవ డీఎన్ఏతో ఎప్పుడూ కలవబోదని, జన్యక్రమాన్ని మార్చలేదని పరిశోధకులు తమ అధ్యయనాలతో స్పష్టం చేశారు.
అపోహ: టీకా తీసుకుంటే తీవ్ర ప్రతికూలతలు ఎదురవుతాయి.
వాస్తవం: వ్యాక్సినేషన్ తర్వాత స్వల్పంగా తలనొప్పి, కండరాల నొప్పులు లేదా జ్వరం లాంటివి వస్తాయి. అయితే.. టీకా తీసుకున్న తర్వాత ఇలాంటి ప్రతికూలతలు ఎదురవడం అత్యంత సహజం. అలాంటివి ఒకటి, రెండు రోజుల్లో వాటంతటవే తగ్గిపోతాయి. ఆరోగ్యవంతుల్లో కొవిడ్ వ్యాక్సిన్ వల్ల ఎలాంటి ప్రతికూలతలు ఏర్పడవు అని పరిశోధకులు చెబుతున్నారు. అయితే.. బ్రిటన్లో టీకా తీసుకున్న కొద్దిమంది అలెర్జీకి గురయ్యారు. దీనిపై అక్కడి అధికారులు దర్యాప్తు చేపట్టారు.
అపోహ: టీకా తీసుకుంటే వంధ్యత్వానికి దారి తీస్తుంది.
వాస్తవం: కొన్ని సంస్థలు అభివృద్ధి చేసిన టీకా తీసుకుంటే.. మహిళల్లో సంతానలేమికి దారి తీస్తుందన్న వదంతులు వినిపిస్తున్నాయి. అయితే అది పూర్తిగా అవాస్తవం. ఇంతవరకు టీకా వల్ల మహిళల్లోగానీ, పురుషుల్లోగాని వంధ్యత్వం కలుగుతుందనడానికి ఎలాంటి ఆధారాలు లేవు.
అపోహ: టీకాతో మన శరీరంలోకి చిప్ అమర్చుతారు.
వాస్తవం: ప్రజలపై నిఘా పెట్టేందుకు టీకా ద్వారా శరీరాల్లోకి మైక్రోచిప్ను చేర్చేందుకు ప్రభుత్వం యత్నిస్తోందన్న వదంతులు వినిపిస్తున్నాయి. అయితే.. టీకాలో చిప్ను అమర్చేంతటి సాంకేతికత ఇప్పటివరకు అందుబాటులో లేదు. ప్రజల్లో ఉన్న ఇలాంటి అనుమానాలను నివృతి చేయాలన్న ఉద్దేశంతో ఓ దిగ్గజ ఫార్మా సంస్థ.. తమ టీకా తయారీకి వినియోగించిన ఇన్గ్రీడియంట్స్ జాబితాను ఇటీవల విడుదల చేసింది.
అపోహ: సహజంగా వచ్చే రోగనిరోధక శక్తి మాత్రమే ఉత్తమం. టీకాతో పెద్దగా ప్రయోజనం లేదు.
వాస్తవం: ఏ రకమైన వ్యాధి సోకినా సహజంగా ఏర్పడే రోగనిరోధక శక్తి ఉత్తమమైంది. కానీ, కొవిడ్ విషయంలో మాత్రం అది సాధ్యం కాకపోవచ్చు. ఇటీవల కరోనా నుంచి కోలుకున్న వారిలో రెండోసారి వ్యాధి సోకిన సంఘటనలు వెలుగు చూశాయి. వ్యాక్సిన్ ద్వారా మాత్రమే దీర్ఘకాలం పాటు రోగనిరోధక శక్తి ఉంటుంది.
అపోహ: నా చుట్టూ ఉన్నవారు టీకా తీసుకుంటే.. నాకు ఇక టీకా అవసరం లేదు. ఎందుకంటే అప్పుడు హెర్డ్ ఇమ్యూనిటీ వచ్చేస్తుంది.
వాస్తవం: హెర్డ్ ఇమ్యూనిటి సాధించడం ఇప్పట్లో సాధ్యమయ్యేది కాదు. దానికి ఇంకా 18 నెలల సమయం పట్టవచ్చు. నిత్యం వేల మంది కొవిడ్ వల్ల మరణిస్తున్నారు. హెర్డ్ ఇమ్యూనిటీ వచ్చే వరకు ఎదురుచూస్తే మనమూ బాధితులుగా మారక తప్పదు!
అపోహ: తీవ్రంగా అలర్జీలు ఉన్నవారు వ్యాక్సిన్ వేయించుకోరాదు.
వాస్తవం: అన్ని రకాల వ్యాక్సిన్లు ఏదో రకమైన అలర్జీకి దారి తీస్తాయి. అంతకుముందే అలెర్జీలు ఉన్నవారు టీకా వేయించుకోవాలా వద్దా అని తమ ఫిజీషియన్ను సంప్రదిస్తే సరిపోతుంది.
ఇదీ చూడండి:దేశంలో కొత్తగా 20,021 కరోనా కేసులు
