దేశంలో కరోనా టెస్ట్ల సంఖ్య 9కోట్ల మార్క్ను దాటింది. మంగళవారం ఒక్కరోజే 11,45,015 నమూనాలను పరీక్షించినట్టు పేర్కొంది కేంద్ర ఆరోగ్య శాఖ. దీంతో మొత్తం టెస్ట్ల సంఖ్య 9కోట్ల 90వేల 122కు చేరింది. దేశంలో ఇప్పటివరకు 8.26లక్షలకు పైగా యాక్టివ్ కేసులున్నాయి. మొత్తం కేసుల్లో ఇది 11.42శాతం.
దేశవ్యాప్తంగా వైరస్ పాజిటివ్ రేటు 8.04గా నమోదైందని కేంద్ర ఆరోగ్య శాఖ వెల్లడించింది. 20 రాష్ట్రాలు, కేంద్రపాలిత ప్రాంతాలలో పాజిటివ్ కేసుల రేటు జాతీయ సగటుకంటే తక్కువగా ఉందని పేర్కొంది ఆరోగ్యశాఖ. దేశంలో యాక్టివ్ కేసుల సంఖ్య గణనీయంగా తగ్గుతోందని స్పష్టం చేసింది.
కొద్దిరోజులుగా కొత్త కేసుల కంటే, కోలుకున్న వారి సంఖ్యే గణనీయంగా పెరుగుతోందని తెలిపింది.
కరోనా బారినపడినవారిలో ఇప్పటివరకు సుమారు 63.01లక్షల మంది వైరస్ను జయించారు. ఫలితంగా రికవరీ రేటు 87.05 శాతానికి పెరిగింది. వైరస్ నుంచి కోలుకున్నవారిలో దాదాపు 79 శాతం 10 రాష్ట్రాల(మహారాష్ట్ర, కర్ణాటక, కేరళ, ఆంధ్రప్రదేశ్, తమిళనాడు, ఉత్తర్ప్రదేశ్, పశ్చిమ్బంగా, ఛత్తీస్గఢ్, ఒడిశా, దిల్లీ)లోనే నమోదవుతున్నాయని పేర్కొంది ఆరోగ్యశాఖ. ఒక్క మహారాష్ట్రలోనే రోజుకు సగటున 15వేల మందికిపైగా రికవరీ అవుతున్నారని స్పష్టం చేసింది.
ఇదీ చదవండి: బిడ్డకు జన్మనిచ్చిన 14 రోజులకే విధుల్లోకి కలెక్టర్
