కరోనా మహమ్మారికి చికిత్సపై పలు కీలక విషయాలు వెల్లడించారు మధ్యప్రదేశ్లోని భోపాల్ ఎయిమ్స్ వైద్యులు. వైరస్ సోకి ఆరోగ్యం తీవ్రంగా విషమించిన రోగులకు మైకోబాక్టీరియమ్ డబ్ల్యూ(ఎమ్డబ్ల్యూ) డ్రగ్తో చికిత్స అందించగా.. మంచి ప్రభావం చూపినట్లు పేర్కొన్నారు. ఈ ట్రయల్స్ ఆశాజనక ఫలితాలు ఇస్తున్నట్లు, ప్రయోగాలను విస్త్రతం చేస్తే మరింత స్పష్టత వస్తుందని సీనియర్ వైద్యులు వివరించారు.
గతకొద్ది రోజులుగా భోపాల్ ఎయిమ్స్లో మైకోబాక్టీరియమ్ డబ్ల్యూ డ్రగ్ క్లినికల్ ట్రయల్స్ నిర్వహిస్తున్నారు. ఇప్పటి వరకు ముగ్గురు రోగులు కోలుకుని డిశ్చార్జ్ ఆస్పత్రి డైరెక్టర్ సర్మాన్ సింగ్ తెలిపారు. మొత్తం నలుగురు రోగులు క్లీనికల్ ట్రయల్స్కు ఒప్పుకున్నట్లు పేర్కొన్నారు.
జపాన్లో కరోనా చికిత్సకు ఉపయోగిస్తున్న ఫెవిపిరవిర్ డ్రగ్ను త్వరలోనే భారత్లోనూ పరీక్షించనున్నట్లు వెల్లడించారు సింగ్. మైకోబాక్టీరియమ్ డబ్ల్యూ డ్రగ్పై మరిన్ని ట్రయల్స్ నిర్వహించి ప్రభావం చూపినట్లు నిరూపితమైతే.. దేశవ్యాప్తంగా కొవిడ్ చికిత్సకు ఉపయోగించవచ్చని ఆశాభావం వ్యక్తం చేశారు.
మైకోబాక్టీరియమ్ డబ్ల్యూ డ్రగ్ను గతంలో కుష్టురోగం చికిత్సకు ఉపయోగించారు. ఇది కొవిడ్పై ఏమేర ప్రభావం చూపుతుందో తెలుసుకునేందుకు కౌన్సిల్ ఫర్ సైంటిఫిక్ అండ్ ఇండస్ట్రియల్ రీసెర్చ్(సీఎస్ఐఆర్), కెడిలా ఫార్మా సంస్థలు సంయుక్తంగా ట్రయల్స్ నిర్వహిస్తున్నట్లు సింగ్ చెప్పారు. దేశవ్యాప్తంగా మొత్తం మూడు ఆస్పత్రులలో మాత్రమే ఈ డ్రగ్ను పరీక్షించేందుకు అధికారులు అనుమతులిచ్చారు. అందులో భోపాల్ ఎయిమ్స్ ఒకటి.
