'అయ్యో.. బిర్యానీ వాసనచూసి ఎన్నాళ్లైంది.. ముక్క లేక ముద్ద దిగట్లేదే.. లెగ్పీస్ లాగించాలని మనసులాగుతోందే!' ఇదీ క్వారంటైన్లో ఉన్న నలుగురు కరోనా బాధితుల ఆవేదన! అవును, యావత్ భారతం కరోనా పంజాకు చిక్కకూడదని బిక్కుబిక్కుంటుంటే.. కరోనా సోకిన వారు మాత్రం ఆసుపత్రి నుంచే ఆన్లైన్లో బిర్యానీలు, తందూరీ చికెన్లు ఆర్డర్ చేసుకున్నారు.
కొద్ది రోజుల క్రితం తమిళనాడు సాలెం జిల్లా ఆసుపత్రికి కరోనా లక్షణాలతో వచ్చిన 35 మందికి వైరస్ సోకినట్లు నిర్ధరించారు వైద్యులు. వారిని ఐసోలేషన్ వార్డులోనే నిర్బంధించి చికిత్స అందించారు. వారంతా ప్రస్తుతం కోలుకున్నారు. కొందరు ఇంటికి వెళ్లిపోగా.. ఇతర రాష్ట్రాలకు చెందిన 22 మందిని మాత్రం ఆసుపత్రిలోనే ఉంచారు వైద్యులు.
చికెన్ తినక చాలా రోజులైందేమో.. వారిలో నలుగురు ముక్క తినాలని తహతహలాడారు. ఇంకేముంది వెంటనే ఫోన్ తీసి.. ఆన్లైన్లో బిర్యానీ విత్ తందూరీ చికెన్ ఆర్డర్ కొట్టారు.
విషయం తెలుసుకున్న వైద్యులు నివ్వెరపోయారు. ఒకసారి కరోనా బారినపడి ఇప్పుడిప్పుడే కోలుకుంటున్నవారు జాగ్రత్తగా ఉండాల్సిందిపోయి.. ఇలా బయటి ఆహారంపై మనసుపడడం ఏంటని బాధితులను హెచ్చరించారు.
ఇదీ చదవండి:మాస్క్తో మార్నింగ్ వాక్.. చాలా డేంజర్!
