భారత్లో కరోనా విజృంభణ కొనసాగుతోంది. ఒక్కరోజులోనే 1,975మందికి వైరస్ సోకింది. గత 24 గంటల్లో 47 మంది ప్రాణాలు కోల్పోయారు. మహారాష్ట్రపై వైరస్ ప్రభావం తీవ్రంగా ఉంది. అక్కడ ఇప్పటివరకు 7,628 వైరస్ కేసులు నమోదయ్యాయి. 323మంది ప్రాణాలు కోల్పోయారు.
ఉత్తర్ప్రదేశ్లో వైద్యుడికి కరోనా..
ఉత్తర్ప్రదేశ్ అలీగఢ్ జవహర్లాల్ నెహ్రూ వైద్య కళాశాలలో ఓ వైద్యుడికి కరోనా పాజిటివ్గా తేలింది. ఇప్పటివరకు ఆ కళాశాలలో ముగ్గురు వైద్యులకు వైరస్ సోకింది. రాష్ట్రంలో కొత్తగా 50మంది మహమ్మారి బారినపడ్డారు. రోజు వ్యవధిలో ఇద్దరు ప్రాణాలు కోల్పోయారు. మొత్తంగా మృతుల సంఖ్య 29కి పెరిగింది. రాష్ట్రంలో కేసుల సంఖ్య 1843కు చేరింది. 289మందికి వైరస్ నయమైంది.
బంగాల్లో వైరస్తో వైద్యుడి మృతి..
బంగాల్లో వైరస్తో పోరాడుతూ ఓ ప్రభుత్వ వైద్యుడు, మరో వ్యక్తి ప్రాణాలు కోల్పోయారు. ఆరోగ్య సేవల్లో అసిస్టెంట్ డైరెక్టర్గా పనిచేసే డాక్టర్ విప్లవ్ దాస్ గుప్తా శ్వాసకోశ సంబంధిత సమస్యతో బాధపడుతూ అసువులు బాశారు. ఆయనను పలు ఆసుపత్రుల్లో చేర్చి చికిత్స అందించినప్పటికీ ఫలితం లేకుండా పోయింది. రాష్ట్రంలో ఇప్పటివరకు 611మందికి వైరస్ సోకింది. 18మంది ప్రాణాలు కోల్పోయారు.
అండమాన్లో..
కేంద్రపాలిత ప్రాంతమైన అండమాన్ నికోబార్ ద్వీపంలో మరో నలుగురికి కరోనా సోకింది. అక్కడ కేసుల సంఖ్య 33కు పెరిగింది.
అసోంలో 8మందికి నయం..
అసోంలో ఎనిమిది మందికి వైరస్ నయమైంది. రాష్ట్రంలో 35 మంది మహమ్మారి బారినపడగా ఇప్పటివరకు 27మందికి వైరస్ నయమైంది. ఒకరు ప్రాణాలు కోల్పోయారు.
రాజస్థాన్లో 69 కొత్త కేసులు..
రాజస్థాన్లో ఇవాళ మరో 69 మందికి కొత్తగా వైరస్ సోకింది. రాష్ట్రంలో వైరస్ బాధితుల సంఖ్య 2152కి పెరిగింది. మొత్తం 35 మంది కన్నుమూశారు. జైపుర్లోనే 19మంది మృతి చెందారు.
ఉత్తరాఖండ్లో..
ఉత్తరాఖండ్లో మరో ఇద్దరు కరోనా బారినపడ్డారు. దీంతో రాష్ట్రంలో వైరస్ సోకిన వారి సంఖ్య 50కి చేరింది. 26 మందికి వైరస్ నయమైంది.
15మంది సీఆర్పీఎఫ్ సిబ్బందికి వైరస్..
సీఆర్పీఎఫ్ దిల్లీ విభాగానికి చెందిన 15మంది జవాన్లకు మహమ్మారి సోకింది. ఇప్పటివరకు ఆ విభాగంలో 24మంది కరోనా బారినపడ్డారు. వారిని నిర్బంధంలో ఉంచి చికిత్స అందిస్తున్నారు. ఆగ్రా నుంచి ఛత్తీస్గఢ్కు వెళ్లిన 14మంది బీఎస్ఎఫ్ జవాన్లకు కరోనా ఉందని అనుమానాలు తలెత్తిన కారణంగా వారిని నిర్బంధంలో ఉంచారు.
కేరళలో 11మందికి వైరస్..
కేరళలో మరో 11మందికి వైరస్ సోకింది. మొత్తంగా వైరస్ బాధితుల సంఖ్య 123కు పెరిగింది. మరో నలుగురికి వ్యాధి నయమైంది.
తమిళనాడులో..
తమిళనాడులో మరో ఇద్దరు వైరస్ బాధితులుగా మారారు. మొత్తంగా మహమ్మారి బారినపడిన వారి సంఖ్య 1755కు చేరింది. ఇప్పటివరకు 22మంది కరోనాతో ప్రాణాలు కోల్పోయారు.
ఇదీ చూడండి: సరిహద్దు వద్ద 300 మంది ఉగ్రవాదులు- ఏ క్షణమైనా!
